రామాయణమ్ 287
...
మేమందరము పలు విధాలుగా వెతుకుతూ దారితప్పి వింధ్యపర్వతము వద్దకు చేరగా పలు దినములు గడచిపోయినవి.
.
కార్యసాధనలో విఫలురమయినామన్న బాధ ఒక ప్రక్క ,మరొకప్రక్క గడువుదాటిన పిమ్మట తిరిగి వెళ్ళినచో సుగ్రీవుడు విధించు కఠినదండన మా మనస్సును నిలకడగా ఉండనీయక వేధింప ప్రారంభించినవి.
.
వేరే దారి ఏది కనపడక ప్రాణత్యాగమే శరణ్యమని నిశ్చయించుకొ‌ని ప్రాయోపవేశమునకు సిద్ధపడుతూ నిన్ను అపహరించినదాదిగా జరిగిన సంఘటనలను మాలో మేము ఏకరువు పెట్టుకొనుచుంటిమి .ప్రసంగవశమున జటాయువు ప్రస్తావన రాగా అది విని ఒక గొప్ప ముదుసలి గృధ్రరాజు అట కు ఏతెంచెను.
.
ఆయన ఎవరో కాదు జటాయువు సోదరుడు సంపాతి !
.
ఆవేశముగా మమ్ము ప్రశ్నించాడు సంపాతి .నా తమ్ముడిని ఎవ్వరు ఎక్కడ చంపి వేసినారు ? ఏ కారణము వలన అట్లు జరిగినదని మమ్ము ప్రశ్నించగా మేము ఆయనకు జరిగిన విషయమును ఎరుక పరచితిమి.
.
అంత సంపాతి నీ యొక్క జాడను మాకు తెలియ చెప్పెను. నీవు బందీవై రావణుని గృహములో ఉన్నావని చెప్పినాడు .తన దృష్టికి నీవు కనపడినావని కూడా మాకు తెలిపినాడు.
.
నీ జాడ తెలిసిన మాకు పోయిన ప్రాణములు తిరిగివచ్చినట్లాయెను .
.
నీ జాడ కనుగొనుట కొరకు నేను నూరుయోజనముల పొడవు గల సముద్రమును లంఘించి దుమికి లంకా పురి చేరినాను.
.
రావణలంకలో రాత్రిపూట ప్రవేశించి అంతటా వెతుకుతూ ఇచటికి చేరి దుఃఖసాగరములో మునిగియున్న నిన్ను కనుగొన్నాను తల్లీ!
.
ఓ పరమపావనీ !
ఓ దోషరహితా !
ఓ పుణ్యచరితా
సీతామాతా !
అన్నివిషయములు నీకు ఎరుక పరచితినమ్మా !
నేను రావణుడను కాను రామునిబంటును హనుమంతుడు నాపేరు .
.
కేసరీ,అంజనాదేవి నా తల్లితండ్రులు వారికి వాయుదేవుని వరప్రసాదము వలన నేను జన్మించితిని.
.
నా ఇష్టము వచ్చిన రూపములు ధరించగల శక్తి నాకున్నదమ్మా!
.
అమ్మా ! నా అదృష్టము బాగున్నది సముద్రలంఘనము వ్యర్ధము కాలేదు !
నిన్ను కనుగొంటినన్న కీర్తిపొందగలవాడను !
.
ఈ విధముగా మాటలాడిన హనుమ పలుకులను విశ్వసించి ఆతడు శ్రీరామదూతయే అని సీతమ్మ తెలుసుకొన్నదాయెను.
.
వూటుకూరు జానకిరామారావు
.
కామెంట్‌లు లేవు:
కామెంట్‌ను పోస్ట్ చేయండి