*దోసె అవతారములు

  *దోసె అవతారములు*

(ఎవరు వ్రాసారో తెలియదు)

కం//

దోసెలముక్కలు గిన్నెన

పోసిన సాంబారునందు బుడబుడ తేలన్

చూసిన మీనము బోలెడి

దోసది 'మత్స్యావతార' తీరుర శ్యామా!

2 కం//

గర్మాగరమ్ము దోసెను

కూర్మాలోనంచుకొనుచు కూరిమి తినగన్

'కూర్మావతార' దోసని

ధర్మముగద దీనిఁ బిలువ ధరణిని శ్యామా!

3 కం//

కుడుమంత వెన్నముద్దను

మడచిన దోసందు నిల్పి మమకారముతో

పడకుండ నోట బెట్టిన

పుడమిని నిల్పిన 'వరాహ' మొప్పును శ్యామా!

4 కం//

గుంటూరు మిర్చి అల్లము

జంటగ కారంపుపొడిని చక్కగ జల్లన్

మంటలు రేగును నోటన

తింటే 'నరసింహ' దోస తిప్పలు శ్యామా!

5 కం//

కొద్దిగ మిగిలిన పిండిని

నొద్దికనొక చిన్నదోసె నోరిమి చేయన్

అద్దిర 'వామన' దోసన

ముద్దుగ పిల్లలకు ప్రీతి పుల్లెల శ్యామా!

6 కం//

చక్కగ చేతితొ దోసెను

ముక్కలుగా జేసి తినక స్పూనులు కత్తుల్

తక్కడు ఫోర్కులు వాడుట

తిక్కేగద 'పరశురామ' తీరున శ్యామా!

7 కం//

అల్లపుపచ్చడి మాత్రమె

చెల్లును దోసెకని యేకచెట్నీవ్రతమున్

ఎల్లప్పుడు పాటించిన

పిల్లా! యది 'రామ' దోసె పేర్కొన శ్యామా!

8 కం//

పుట్నాలల్లము వంటివి

చట్నీలొక యెనిమిదేసి చక్కగ దానిన్

'కిట్నుడి' దోసని పిలుతురు

పట్నమునొక హోటలందు భళిరా శ్యామ!

(కిట్నుడు is vernacular for కృష్ణుడు)

9 కం//

ఉప్పూ కారము వలదని

చప్పగ దోసెలను జేయ చచ్చును జిహ్వల్

చెప్పగ 'బుద్ధుని' దోసది

నప్పదు గద యట్లు తినుట నరులకు శ్యామా!

10 కం//

గుర్రపుదినుసులు జొన్నలు

కొర్రలతో దోసె చేసి కూరిమి తినగన్

హర్రీ కలియుగమున బల

మర్రా ఈ 'కల్కి' దోసె అవనిని శ్యామా!

(గుర్రపు దినుసులు = Horse Gram = ఉలవలు)