మకరి- మహాయోగి యైనదా?

 శు భో ద యం🙏

మకరి- మహాయోగి యైనదా?

" పాదద్వంద్వము నేలమోపి పవనున్ బంధించి పంచేంద్రియో

న్మాదంబున్పరిమార్చి బుధ్ధిలతకున్ మారాకుహత్తించి ని

ష్కేద బ్రహ్మ పదావలంబనగతిన్ క్రీడించు యోగీంద్రు మ

ర్యాదన్ నక్రము విక్రమించె కరిపాదాక్రాంత నిర్వక్రమై; 

భాగ-గజేంద్రమోక్షణము-బమ్మెఱపోతన! 

    భాగవతంలో గజేంద్రమోక్షణమొక అద్భుత ఘట్టము. పోతన తనకవితా చాతుర్యమును వెలయించి దీనిని మిగుల నపురూపముగాతీర్చిదిద్దినాడు."కరి-మకరుల పోరుసందర్భములోనిది" ప్రస్తుత పద్యరత్నము. 

            కరిని గెలువగోరి మకరి యోగీంద్రునివలె సాధనచేయుచున్నదట!

       యోగసాధనచేయునప్పుడు యోగి పాదములను నేలపై సమముగానుంచి ప్రాణాయామమునకుపక్రమించి వాయుబంధనమొనరించి,బుధ్ధిని భగవంతుని యందు లగ్నమొనరించి భగవత్పాదారవిందములపైననే దృష్టిని కేంద్రీకరించి యేమరుపాటునువీడి సాధనగావించుచుండును. అదిగో ఆమాదిరిగా నున్నదట మొసలి సాధన! తనరెండు కాళ్ళను నేలపైనూదిపట్టి.గాలినిబిగబట్టి.యేమరుపాటులేక తాబట్టినగజేంద్రునిపాదములపైననే 

దృష్టినంతయుకేంద్రీకరించి, ఏమాత్రముపట్టువిడువక,,బ్రహ్మపదమునందగోరు యోగీంద్రునిసాధననుపమించుసాధనతో కరిని గెలువ మకరి యత్నించు చున్నదట! 

       ఆహా! పోతన కవీంద్రా! పశుయోనియగు కరియేడ? మహాయోగియేడ? దానిసాధన యోగిసాధనతో నుపమించి యద్భుతమును సృజియించినావుగదా! నీకు వేరెవరుసాటి? ఇదో స్వీకరింపుము మాప్ర ణామాంజలులు!

              స్వస్తి!🙏🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷