శ్రీల ప్రభుపాద ఉవాచ!

 శ్రీల ప్రభుపాద ఉవాచ!

🌿🌷🌿🌷🌿🌷🌿🌷🌿🌷🌿🌷🌿🌷🌿

భౌతిక ప్రపంచంతో సంబంధం ఏర్పరచుకున్న జీవులందరూ తమను తాము సరిదిద్దుకోవలసిన అవసరం ఉంది. ఈ భౌతిక ప్రపంచంలోని జీవులందరూ భగవంతుని సేవ పట్ల విముఖులై, ఆయనకు వ్యతిరేకంగా తిరుగుబాటు చేసిన కారణంగా, వారు నిత్యబద్ధులుగా ఈ భౌతిక ప్రపంచంలోనే ఉండిపోతున్నారు. అందువల్ల వారు మళ్లీ మళ్లీ జన్మలను స్వీకరిస్తున్నారు.

వారికి ఈ బంధనాల నుండి విముక్తి పొందే అవకాశం తప్పకుండా ఉంది. అయినప్పటికీ, ఆ అవకాశాన్ని సద్వినియోగం చేసుకోకుండా, బద్ధజీవులు ఇంద్రియ భోగాల జీవితాన్నే కొనసాగిస్తున్నారు. ఫలితంగా వారు మళ్లీ మళ్లీ జనన మరణాలకు గురవుతున్నారు. ఇదే ప్రకృతి నియమం.

భగవద్గీత (7.14)లో శ్రీకృష్ణ భగవానుడు ఇలా చెబుతున్నారు:

దైవీ హ్యేషా గుణమయీ

మమ మాయా దురత్యయా ।

మామేవ యే ప్రపద్యంతే

మాయామేతాం తరంతి తే ॥

"త్రిగుణాత్మకమైన నా ఈ దైవీ మాయను అధిగమించడం చాలా కష్టం. అయితే ఎవరైతే నన్ను సంపూర్ణంగా శరణు పొందుతారో, వారు ఈ మాయను సులభంగా దాటగలరు."

అదేవిధంగా భగవద్గీత (15.7)లో భగవానుడు ఇలా అంటున్నారు:

మమైవాంశో జీవలోకే

జీవభూతః సనాతనః ।

మనః షష్ఠానీంద్రియాణి

ప్రకృతిస్థాని కర్షతి ॥

"ఈ బద్ధ ప్రపంచంలోని జీవులందరూ నా శాశ్వతమైన అంశలే. అయితే బద్ధజీవితంలో చిక్కుకున్న కారణంగా, మనస్సుతో కూడిన ఆరు ఇంద్రియాలతో వారు ప్రకృతిలో తీవ్రంగా పోరాడుతున్నారు."

భౌతిక ప్రపంచంలో జీవుడు సాగించే ఈ అస్తిత్వ పోరాటానికి కారణం అతని తిరుగుబాటు స్వభావమే. ఒక జీవుడు శ్రీకృష్ణుని శరణు పొందనంతవరకు, అతడు ఈ పోరాటపూరిత జీవితాన్ని కొనసాగించవలసిందే.

కృష్ణ చైతన్య ఉద్యమం మోసపూరితమైనది కాదు. బద్ధజీవులందరి సంక్షేమాన్ని కాంక్షిస్తూ, ప్రతి ఒక్కరినీ కృష్ణ చైతన్య స్థాయికి ఉన్నతీకరించడానికి ఉద్దేశించిన ఒక ప్రామాణికమైన ఆధ్యాత్మిక ఉద్యమం ఇది.

భగవానుడే భగవద్గీత (18.68–69)లో ఈ విషయాన్ని స్వయంగా ధృవీకరిస్తున్నారు:

య ఇదం పరమం గుహ్యం

మద్భక్తేష్వభిధాస్యతి ।

భక్తిం మయి పరాం కృత్వా

మామేవైష్యత్యసంశయః ॥

న చ తస్మాన్మనుష్యేషు

కశ్చిన్మే ప్రియకృత్తమః ।

భవితా న చ మే తస్మాత్

అన్యః ప్రియతరో భువి ॥

"ఈ పరమ రహస్యమైన భగవద్గీత జ్ఞానాన్ని నా భక్తులకు వివరించే వ్యక్తి, నాపట్ల పరమ భక్తిని పొందుతాడు. అంతిమంగా అతడు నిస్సందేహంగా నా వద్దకు తిరిగి వస్తాడు.

ఈ ప్రపంచంలో అతని కంటే నాకు ప్రియమైన సేవకుడు మరొకరు లేరు. భవిష్యత్తులో కూడా అతని కంటే నాకు ప్రియమైనవారు మరొకరు ఉండరు."

(శ్రీమద్భాగవతం, షష్ఠ స్కంధం, చతుర్థ అధ్యాయం, 44వ శ్లోకం)

🙏 హరే కృష్ణ!

సదా మీ శ్రేయోభిలాషి