24, డిసెంబర్ 2025, బుధవారం

తిరుప్పావై ప్రవచనం‎- 9 వ రోజు*


వేకువ ఝామున పాడుకొనుటకు…

```


*తిరుప్పావై ప్రవచనం‎- 9 వ రోజు*

               ➖➖➖✍️

              9 వ పాశురము:


*తూమణి మాడత్తు చ్చుత్తుమ్ విళక్కెరియ*

*తూపమ్ కమళ త్తుయిలణై మేల్ కణ్ వళరుమ్*

*మామాన్ మగళే! మణిక్కదవమ్ తాళ్ తిఱవాయ్*

*మామీర్! అవళై యెళుప్పీరో! ఉన్ మగళ్ దాన్*

*ఊమైయో? అన్ఱిచ్చెవిడో? ఆనన్దలో*

*ఏమప్పెరున్దుయిల్ మన్దిరప్పట్టాళో?*

*"మామాయన్, మాదవన్; వైగున్దన్" ఎన్ఱెన్ఱు*

*నామమ్ పలవుమ్ నవి న్ఱేలో రెమ్బావాయ్!*



*🌺భావము:*```

నిర్దోషమలైన మాణిక్యములతో నిర్మించిన భవనంలో చుట్టునూ దీపాలు వెలుగుతుండగా, అగరు ధూపములను పరిమళాలను వెదజల్లుచుండగా, అతిమెత్తనైన హంసతూలికా తల్పముపై పరుండి నిద్రిస్తున్న ఓ మేనమామ కూతురా! మణిమయ ప్రభలతో ప్రకాశించుచున్న నీ భవనపు గడియను తీయవమ్మా! ఏమమ్మా! మేనత్తా! నీవైనా ఆమెను లేపుమమ్మా! ఏమి? నీ పుత్రిక మూగదా? చెవిటిదా? లేక బద్దకస్తురాలా? లేక ఆమె లేవకుండగ ఎవరినైన కావలి వుంచినారా? లేక యింత మైమరచి నిద్రించుటకేమైన మంత్రించి వుంచినారా? ఆమెకేమైనది నిద్ర లేచుటలేదు? 

'ఓ ఆశ్చర్య గుణచేష్టితుడా! ఓ శ్రియః పతీ! ఓ పరమపదవాసీ!' అని అనేకమైన తిరునామాలను అనుసంధిస్తున్ననూ ఆమెకు వినబడుటలేదేమి? ఇంకను లేవదేమి? అని సంపదలతో తులతూగుతున్న ఒక కన్యను లేపుచున్నారు.```



*🌸అవతారిక :*```

'తూరుపుతెలవారె! ఓ జవ్వనీ లేవవే!' అంటూ పాడి 8వ (పాశురం) మాలికలో భగవదనుభవాన్ని పొందటానికి కుతూహలపడుతున్న ఒక గోపికను లేపి తన వ్రతంలో భాగస్వామిని చేసింది గోదాతల్లి. ఇప్పటివరకు శ్రవణం (వినటం) మననం (విన్నదానిని మాటిమాటికి స్మరించటం) వీటియొక్క విశిష్ఠతను తెలిపి ముగ్గురు గోపకన్యలను గోదా మేల్కొలిపి తన వ్రతంలో చేర్చుకొంది. ఇక (9మొదలు 12 మాలికలలో (పాశురాలలో) ధ్యానం యొక్క విశిష్ఠతను తెలుపబోతోంది. ఎల్లప్పుడూ శ్రవణము, మననమూ చేసే వారియొక్క మనస్సు పవిత్రమౌతుంది. నిర్మలమౌతుంది. మాలిన్యం తొలగితేనేకద జ్ఞానం చోటు చేసుకొనేది. అప్పుడా జ్ఞానమే 

ఆ జీవికి కవచమైపోతుంది. నిస్వార్ధమైన వ్రాత నిష్ఠ కలిగినవారికే తన్ను లభించే హక్కు కలదన్నాడు శ్రీకృష్ణ పరమాత్మ. మరిక మనకు స్వాతంత్ర్యం ఎందుకు? పరమాత్మ తానే స్వయంగా మన వద్దకు వచ్చి మన అభీష్టాలను తీరుస్తాడు. కావున మనం ఎచటికినీ పోక వున్నచోటునే భగవదనుభవ ఆనందాన్ని అనుభవిస్తూ వుంటే చాలుననుకొని అతి సుందరమైన మణిమయ భవనంలో నిద్రిస్తూన్న నాల్గవ గోపికను (యీ మాలికలో) లేపుచున్నారు. 'ఓ మామకూతురా! మరదలా లేలెమ్ము!' అంటున్నారు.```


🌷*9.వ మాలిక:*```

(కాంభోజి రాగము-ఆదితాళము)


1. ప.. ఓ మామకూతుర! మరదలా!


అ..ప.. ఏమిది? మణిమయ ద్వారము తెరువవు?

ఓ మామ కూతుర! మరదలా!


చ.. పావన మణిమయ భావనమందున

దివ్వెల వెలుగులు ధూపములమరగ

దివ్యమౌ తల్పమున దిటవుగ శయనించి

అవ్యక్తమైన నిద్దురపోదువటవే!


2 చ. మూగద? చెవిటిద? మిగుల నలసినద?

ఆగడప కావలి నందుంచబడినద?

ఆ గాఢ నిద్రకు మంత్రించబడినద?

వేగమె లేపవె! నీ కూతునత్తరో!


3 చ. లీలామానుష మాధువుడీతడు

కేళీలోలుడు వైకుంఠవాసుడు

చెలియలగూడి తిరునామ కీర్తనము

ఇలవెలియగ పలుమారు పాడితిమి

ఓ మామకూతుర! మరదలా!```



🌼*తొమ్మిదవరోజు ప్రవచనం:*

```

భగవంతునికి మనకు ఉన్న సంబంధం

*ఆండాళ్ తిరువడిగలే శరణం* ```



 🍀*పాశురము:*


*తూమణి మాడత్తు చ్చుత్తుం విళక్కెరియత్*

*దూపం కమళత్తుయిల్ అణైమేల్ కణ్ వళరుం*

*మామాన్ మగళే! మణి క్కదవం తాళ్ తిఱవాయ్*

*మామీర్! అవళై ఎళుప్పీరో ఉన్ మగళ్ తాన్*

*ఊమైయో అన్ఱి చ్చెవిడో అనందలో*

*ఏమ ప్పెరుందుయిల్ మందిర ప్పట్టాళో*

*మామాయన్ మాదవన్ వైకుందన్ ఎన్ఱెన్ఱు*

*నామం పలవుం నవిన్ఱేలోర్ ఎంబావాయ్*


ఆండాళ్ తల్లి ఈరోజు నాలుగో గోపబాలికను లేపుతుంది. *"తూ"* పరిశుద్దమైన *"మణి"* మణులతో చేసిన *"మాడత్తు"* మేడ, *"చ్చుత్తుం విళక్కెరియ"* చుట్టూ దీపాలు వెలిగించి ఉన్నాయి. ఇక్కడ మనం దీపం పెట్టే ఆంతర్యం తెలుసుకుందాం. దీపం లేని ఇల్లు ప్రాణం లేని శరీరం వంటిదే. దీపపు ప్రమిద శరీరానికి ప్రతీక, దానిలోని నూనె లేక నెయ్యి మనలోని ప్రేమ వంటిది. అయితే ఈ ప్రేమ భగవంతుని కోసం ప్రకాశించగలిగితే మన జన్మ ధన్యం. అలా ప్రకాశింపచేయాలంటే మనకు శాస్ర్తాలు కావాలి. శాస్ర్తాలకు గుర్తు మనం పెట్టే వత్తులు. ఆరెండు వత్తులు దేవుడి వైపు తిరిగి ఉండాలి. ఒక వత్తు వేదం, ఒక వత్తు ఆ వేదాలను వివరించే వ్యాఖ్యానాలు. అందులో వెలిగే నిప్పే మనలోని జ్ఞానం. అందుకే మన జ్ఞానం ప్రేమమయమై అది శాస్త్రాలకు అనుగుణంగా ఉండగలిగితే ఎదురుగుండా ఉండే రూపం మనకు చక్కగా దర్శనం ఇస్తుంది. ఈ గోపబాలిక వెలుతురుకోసం దీపం వెలిగించలేదు, అది మంగళకరమని వెలిగించింది. కృష్ణుడు ఇంటిచుట్టూ ఉంటాడని కృష్ణ సంబంధం కోసం ఇంటిచుట్టూ దీపాలు వెలిగించింది. *"ధూపం కమళ"* ధూపం పరిమళిస్తుంది. *"త్తుయిల్ అణైమేల్ కణ్ వళరుమ్"* నిద్రపుచ్చే అందమైన ఒక పడక పై కన్నులు మూసుకొని పడుకొని ఉన్నావా. *"మామాన్ మగళే!"* ఓ మామగారి కూతురా! *"మణి క్కదవం తాళ్ తిఱవాయ్"* మణులతో చేసిన ద్వారం తెరుచుకొని రావమ్మా. ``` సంస్కృతంలో వివిధ అంకెలకు గుర్తుగా, తొమ్మిది మణులు, ఏకాదశ రుద్రులు, ద్వాదశ ఆదిత్యులు అని ఇలా కొన్ని ఉపమాన సంబంధంతో చూపిస్తారు. ఇక్కడ మణి అనగానే మనకూ భగవంతునికి ఉండే తొమ్మిదిరకాల సంబంధాలు తెలుసుకోవాలి.



1. మనందరికి తండ్రి ఆయనే!


2. మనందరిని రక్షించేవాడు ఆయనే


3. మనందరిని నావాళ్ళు అన కల్గిన వాడు ఆయనే- శేషి అంటారు.


4. మనందరిని భరించేవాడు ఆయనే - భర్త అంటారు.


5. మనలోని జ్ఞానాన్ని పనిచేయిస్తూ ఇందులో మనకు తెలియాల్సినవాడు ఆయనే- జ్ఞేయము అంటారు.


6. మనందరిని తన వస్తువులుగా కల్గి ఉండి వాటికి స్వామి ఆయనే


7. మనందరికి ఆధారం ఆయనే - నారాయణుడు అంటారు


8. మనందరి లోపలుండే ఆత్మ ఆయనే - అంతర్యామి అంటారు


9. భోక్తా ఆయనే. స్వీకరించగల వాడు ఆయనే


లోకంలో మనం ఏదో ఒక సంబంధం అమ్మ,నాన్న, భార్య ఇలా ఉన్న ఒక్కొక్క సంబంధం వల్ల ఎంత ప్రేమ కల్గి ఉంటాం, అదే ఇన్ని సంబంధాలు కల్గి, శాశ్వతంగా వీడని సంబంధం మనకు ఆయనతో ఉంటే మరెంత ప్రేమ ఉండాలి ఆయనపై మనకు! ```

*"పితా రక్షకః శేషి భర్తా జ్ఞేయ స్వామి ఆధారః ఆత్మా భోక్తా"* అష్టాక్షరీ మహా మంత్రం దీన్నే తెలిపింది. భగవద్గీతలో ఎన్నో సార్లు ఈ విషయం చెప్పాడు. ఈ జ్ఞానం మనకు కలగాలి. ఈ జ్ఞానమే ఆగోపిక వెలిగించిన దీపాలు. మనలోని మంచి ఆచరణ ధూప పరిమళాల వంటిది.


అలాంటి జ్ఞానుల అభిమానం మనపై ఏర్పడితే మన జన్మ ధన్యం. వారి దివ్య ఆకృతిని స్మరించుకున్నా వాళ్ళ స్థానాన్ని తలచుకున్నా మనం తరించిపోతాం. మనం ఈ శరీరంపై దృష్టి ఉండి ఇకపై దేనియందు మనస్సు అనిపించదు, దీన్ని పోషించుకోవాలి, దీని కోసం దేన్నైనా వదిలెయ్యాలి అని ఇలా దేహ భ్రాంతి పెరిగిపోతుంది, ఈ తలుపు తెరుచుకోవాలి. ఈ ఆకర్షణమైన దేహం అనే తలుపు తెరుచుకొంటే లోపలుండే వాడి దర్శనం అవుతుంది. అయితే ఆ తలుపులు మనం తెరుచుకోలేం. ఒక మంత్ర ఆచరణ ద్వారా జ్ఞానులు తెరవాల్సిందే. 


*"మామీర్!" ఓమేనత్తా, "అవళై ఎళుప్పీరో"* మీ కూతురుని లేపమ్మా. ఇంత హాయిగా పడుకొని ఉన్నదంటే శ్రీకృష్ణుడు లోపల ఉన్నట్లే, ఆయనే మాట్లాడనివ్వడం లేదు అంటూ ఆక్షేపించసాగారు. *"ఉన్ మగళ్ తాన్ ఊమైయో"* నీపిల్ల ఏమైనా మూగదా లేక *"అన్ఱి చ్చెవిడో"* చెవిటిదా లేక *"ఆనందంలో"* అలసిపోయిందా *"ఏమ ప్పెరుందుయిల్ మందిర ప్పట్టాళో"* ఎవరైనా కాపలా కాస్తున్నారా లేక ఎవరైనా వచ్చి మంత్రం వేసేశాడా. శ్రీకృష్ణుడే పెద్ద మంత్రం, ఆయన దగ్గర ఉంటే ఇక ఏమంత్రం పనిచెయ్యదు. అక్కడి నుండి బయటకు రావడం కష్టం. భగవత్ జ్ఞానం కల్గిన వ్యక్తి అలానే ఉంటాడు, ఇతరమైన మాటలు మాట్లాడడు. బయటి విషయాల్లో మూగవాళ్ళ వలె ఉంటారు. లౌకికమైన మాటలు వినలేరు ఆ విషయంలో చెవిటివారివలె ఉంటారు. లౌకికమైన పనుల యందు అలిసినట్లు ఉంటారు. భగవంతుడు అలాంటి వాళ్ళను కాపలా కాస్తుంటాడు. ఈ గోపిక అలాంటి జ్ఞాని.


అయితే లోపలగోపబాలిక తల్లి “అలా ఆక్షేపించకండి, ఈమె ప్రవృత్తి మీకు తెలియనిదా, లోపల ఆయన నామాలను స్మరించుకుంటుంది. మీరూ ఆ నామాలను పాడండి, లేచి వస్తుంది”అని చెప్పింది. మేము ఆయన నామాలనే పాడుతున్నాం. ఏమేమి అని అడిగింది. 


*"మామాయన్"* చాలా ఆశ్చర్యమయిన పనులు చేసేవాడు, ఒకనాడు అడివి దహించి పోతుంటే ఒక్కసారి ఇలా మింగేసాడు, మన దృష్టిని ఆకర్షించేందుకు ఎన్నో చిలిపి పనులు, తుంటరి పనులు. ఎలాగో ఒకలాగ ఆయనపై మనస్సు పడేట్టు ఆయన మన బాగుకోసం చేసాడిన్ని పనులు. ఇవన్నీ దయ చేత కారుణ్యం చేత చేసాడు.

ఆ దయ పైకి లేచేట్టు చేసేందుకు ఆయనకు ఒకావిడ ఉంది, మన పాపాలను కనపడకుండా చేసే ఒకావిడ ఉంది, *"మాధవన్"* మా-లక్ష్మీదేవి ధవ-నాథుడు,లక్ష్మీదేవి సంబంధం కల్గిన వాడు ఆయన, మరి ఆయన ఏ దిక్కు లేక మన కోసం రావడంలేదు, ఆయన *"వైకుందన్"* వైకుంఠం అంటే ఈ విశ్వం కంటే మూడు రెట్లు ఎక్కువ- త్రిపాద్ విభూది అనిపేరు. అక్కడుండే వారంతా తన మనస్సు తెలుసుకొని ప్రవర్తించే వారు. అలాంటి వైకుంఠానికి నాథుడు. మన బాగుకోసం మనకోసం వచ్చాడు. ఇలా *"ఎన్ఱెన్ఱు"* ఎన్నెన్నో *"నామం పలవుం నవిన్ఱ్"* నామాలను పలుకుతున్నాం. 


ఇలా శ్రీకృష్ణ సంబంధం తెలిసిన ఒక గోపబాలికను లేపింది ఆండాళ్ తల్లి.'✍️

. *సర్వం శ్రీకృష్ణార్పణమస్తు*

                       🌷🙏🌷```

 🙏

పంచాంగం



 

త్రిఫల ఉపయోగాలు:*

 

*మన ఆరోగ్యం…!


          *త్రిఫల ఉపయోగాలు:*

                 ➖➖➖✍️


```

త్రిఫల చూర్ణం ఒక ముక్కలో చెప్పాలంటే ఈ చూర్ణం ప్రతి రోజు తీసుకుంటే డాక్టరుతో పని ఉండదు.


“మనిషి ఆరోగ్యం”.. వాత,పిత్త,కఫ, లక్షణాలు హెచ్చు తగ్గులపైనే ఆధారపడి ఉంటుందని ఆయుర్వేదం చెబుతుంది.


ఈ హెచ్చు తగ్గులను సమతూకం చేయగలిగిన తిరుగులేని ఔషధమే త్రిఫల చూర్ణం.


*#కరక్కాయ, #తానికాయ, #ఉసిరికాయల మిశ్రమమే ‘త్రిఫల చూర్ణం.’


*త్రిఫల చూర్ణంలో ఒక భాగం కరక్కాయ రెండు భాగాలు తానికాయ నాలుగు భాగాలు ఉసిరికాయ చూర్ణం ఉండాలి.


కొంతమంది ఈ మూడింటిని సమభాగాలుగా కూడా వాడుతుంటారు. మార్కెట్ లోని కొన్ని కంపెనీలు ఈ మూడు కాయలను లోపల విత్తనాలతో సహా చూర్ణం చేసి అమ్ముతున్నారు. విత్తనాలు కాకుండా పై పెచ్చులతో చేసిన త్రిఫలచూర్ణం ప్రభావవంతమైంది.


ఇది సమస్త రోగాలను తగ్గించే అద్భుతమైన శక్తి కలది.


జబ్బులు ఉన్నా లేకపోయినా ఒక నెల పాటు ఈ చూర్ణాన్ని రెగ్యులర్ గా వాడి, మీ శరీరాన్ని గమనించండి. మీరు ఆశ్చర్యపోయే ఫలితాలు కనిపిస్తాయి. మీ ఆరోగ్యం ఎంతో మెరుగుపడుతుంది.


అంతేకాదు త్రిఫల చూర్ణానికి శరీరంలో వేడిని తగ్గించే గుణం కూడా ఉంది.


*అలాగే త్రిఫల చూర్ణం కంటిచూపును పెంచుతుంది. జీర్ణశక్తి,ని ఆకలిని పెంచుతుంది, మలబద్ధకాన్ని తగ్గుతుంది, వాతం నొప్పులు తగ్గుతాయి, చర్మ సమస్యలను, లివర్, ఊపిరితిత్తులు ఆరోగ్యాన్ని మెరుగుపరుస్తుంది, రోగనిరోధక శక్తిని పెంచుతుంది.```


*ఉపయోగించే విధానం:-*```

*ఉదయాన్నే పరగడుపున అర గ్లాస్ గోరువెచ్చని నీటిలో చెంచా త్రిఫల చూర్ణం వేసుకుని తాగాలి. అదేవిధంగా రాత్రి పడుకునే ముందు కూడా తాగాలి.✍️```-సేకరణ.

. *సర్వం శ్రీకృష్ణార్పణమస్తు*

                       🌷🙏🌷```

 🙏లోకా సమస్తా సుఖినోభవన్తు!🙏```

🍀🌺🍀🌺🍀🩺🍀🌺🍀🌺🍀

*రేపటి తరానికి బతుకు, భద్రత లతోపాటు భారతీయత కూడా నేర్పండి.*

                     ➖▪️➖

23, డిసెంబర్ 2025, మంగళవారం

అన్నియు గల లోకంబున

 *2318*

*కం*

అన్నియు గల లోకంబున

సన్నుతమతి మంచినిగని సజ్జనుడయ్యున్.

చెన్నటి వారలెయందలి

చిన్న చెడులనాలకించి చెడునిట సుజనా.

*భావం*:-- ఓ సుజనా! అన్నియునూ ఉన్న ఈ లోకంలో మంచి మనస్సు ఉన్న వారు మంచినే చూచి మంచివారిగా వెలుగుతారు. వ్యర్ధమైనవారు అందులో ఉన్న చిన్న చెడులనే ఆలకించి చెడిపోయెదరు.

*సందేశం*:-- ఈ లోకంలో అన్నీ ఉంటాయి, కానీ అది చూసేవాడి మనస్సును బట్టియే మంచి, చెడుగా గుర్తించబడుతుంది. మంచి మనస్సు ఉన్నవారి కి మంచియే పెద్దగా కనబడుతుంది, చెడ్డ మనస్సు ఉన్న వారికి చెడ్డ యే పెద్ద గా కనబడుతుంది.

*** *కొంపెల్ల శ్రీనివాస శర్మ*

మంకీ ట్రాప్*

 


                 *మంకీ ట్రాప్*

                  ➖➖➖✍️```

(నాన్ పొలిటికల్)సైకాలజీ..అంశం 


ఇటీవల మూడు రోజుల క్రితం చదివిన ఒక చిన్న వార్త... మెదడు నుండి బయటికి పంపించేసినా.. పదేపదే మళ్ళీ వచ్చి మది తలుపు తడుతూనే ఉంది.. ఇంకా నన్ను వెంటాడుతూనే ఉంది.


భాగ్యనగరంలో ఒక బిక్షగాడు మృతి.. పోస్టుమార్టం లో తేలింది ఏమిటంటే, అతను 14 రోజుల నుంచి భోజనం లేదు... 

అంటే ఆకలి మరణం. 

ఇది కూడా పెద్ద సంచలన వార్త ఏమి కాదు, కానీ ఈ వార్తలోని కొసమెరుపు ఏమిటంటే బిక్షగాడి జోలిలో కానీ సంచిలో కానీ అక్షరాల మొత్తము 1లక్ష 34 వేల రూపాయలు దొరికాయి. న్యూస్ హెడ్డింగ్ కూడా ఇదేను. “బిచ్చగాడి దగ్గర భారీ మొత్తమని.”  


ఇక్కడ బాగా గుంజి పడేస్తున్న విషయం ఏమిటంటే అంత డబ్బు ఉంచుకున్న బిక్షగాడు ఒక పూట ఆహారం ఎందుకు తీసుకోలేకపోయాడు? అదీ తన ప్రాణం పోతున్నా.. 14 రోజుల నుంచి ఆకలితో ఉన్నాడు.. తప్ప డబ్బు ఎందుకు ఖర్చు పెట్టలేకపోయాడు? ఏమిటి ఈ మనస్తత్వం ? ఇటువంటి దౌర్భల్యం మనందరిలో కూడా ఉంటుందా? అంటే.. అవుననే చెబుతుంది ‘మానసిక శాస్త్రము.’


ఈ విషయం చదవగానే నాకు మొదట గుర్తు వచ్చిన విషయము “మంకీట్రాప్” 


అవును ఆఫ్రికాలోని ఒక తెగ వారు కోతులను వేటాడటానికి చెట్టు తొర్రలో కానీ, పుట్టలో కానీ, ఇవి కాకపోతే ఎండు కొబ్బరికాయలో... ఖచ్చితంగా కోతి చేయపట్టే అంత రంధ్రం చేస్తారు. ఈ రంధ్రం ప్రత్యేకత ఏమిటంటే.. ఇది కోతి చేయి పట్టే అంత పెద్దదిగా మరియు.. కోతి పిడికిలి బయటికి రానంత చిన్నదిగా ఉంటుంది.. 


ఇక ఈ రంధ్రంలో కోతి కి కావలసిన అరటికాయనో వేరుశనగ గింజలనో పోసి ఉంచుతారు. దీనికి ఆశ పడిన కోతి రంధ్రములో చేయి పెట్టి వాటిని పట్టుకుంటుంది. కానీ పిడికిలిని మాత్రం బయటికి తీయలేక పోతుంది. సరిగ్గా ఇదే సమయంలో ఆ తెగ వారు ఆ కోతిని పట్టుకుంటారు. 


గమ్మత్తుగా మనుషులు తనను సమీపిస్తున్న... ప్రమాదం పొంచి ఉన్న.. కోతి మాత్రం ఆ పిడికిల్ని తెరవలేకపోతుంది. తాను పట్టుకొన్నది వదలలేక పోతుంది.

చివరికి దొరికిపోతుంది. 

దీన్నే సింపుల్ గా మంకీ ట్రాప్ అంటాము.


నిజంగా మనకి ప్రమాదమని.. నష్టమని తెలిసినప్పటికినీ కొన్నిటిని మనం వదులుకోలేకపోతున్నామా? 


అయితే ఇటువంటి మంకీ ట్రాప్ లో మనం ఉన్నట్లే.. 


రోజువారి కష్టపడి సంపాదించుకున్న కూలీ డబ్బులను దాచిపెట్టుకొని ఆసుపత్రికి వెళ్ళటానికి కూడా మనసు ఒప్పుకోకుండా తనువు చాలించిన వారు నాకు చాలా మంది తెలుసు.


నిజంగా డబ్బు అంతగా కట్టి పడేస్తుందా అంటే..డబ్బు కాదుకాని మన తత్వం మనల్ని ట్రాప్ లో పడేస్తుంది.  


నిశితంగా ఇంకా పరిశీలిస్తే మన నష్టాన్ని మనం అంత తొందరగా వదులుకోలేము అనిపిస్తుంది..... 


చచ్చిన బిచ్చగాడిని చూసి నవ్వుకునే మనము .. *మనకు తెలియకుండానే మనమూ అదే ట్రాప్ లో ఉన్నామనిపిస్తుంది. 


ఎప్పుడో తెగిపోయిన ఒక బంధాన్ని పట్టుకొని ఇప్పటికీ ఏడుస్తున్న వాళ్ళము ఎంతమంది లేము? 

ఒక మాట పంతానికి ఇంకెన్నో బంధాలను దూరం చేసుకుని ఒంటరిగా మిగిలిపోయిన వాళ్లు మనలో లేరా?

వ్యాపార లాభాలు అంటూనో, పేరు ప్రతిష్ఠలంటూనో వృత్తికి అంకితం అయిపోయి తన కుటుంబాన్ని పిల్లల్ని నిర్లక్ష్యం చేసిన పెద్దలు నాకు బాగా తెలుసు. మేము పరాజితులమని వాళ్లే ఒప్పుకుంటున్నారు ఇప్పుడు.


అందుకే చిన్న మోతాదులో కానీ పెద్ద మోతాదులో కానీ మనం కూడా ఇటువంటి ట్రాప్ లో ఏమైనా ఉన్నామేమో చూసుకోవాలి. 


అది బంధం కావచ్చు డబ్బు కావచ్చు, కీర్తి కావచ్చు.. మనల్ని పట్టేసి ఉంచుతుందేమో గమనించుకోవాలి. 


అవసరానికి దాన్ని వదులుకోగలమో లేదో చూసుకోవాలి. అప్పుడే మనము ఈ ట్రాప్ నుంచి బయటపడగలం.


మనల్ని ఏడిపించే జ్ఞాపకాలు,  

నో అని చెప్పలేని మోహమాటాలు, తిరిగి అడగలేని అప్పులు, దండించలేని ప్రేమలు...

ఊపిరి సలపనివ్వని పనులు,  

ఒత్తిడి పెంచే కోరికలు, ఆరోగ్యాన్ని హరించే సంపాదనలు, పేరు ప్రఖ్యాతుల కోసం పరుగులు.. ఇలాంటివన్నీ మంకీ ట్రాప్ లే.


మాటలు మాంత్రికుడు త్రివిక్రమ్ చెప్పినట్లు “వదలటం గొప్పా? పట్టుకోవడం గొప్పా?”


*కొన్ని సార్లు వదిలేయడమే గొప్ప. 


రామాయణంలో రావణుడు సీతను వదిలేసి ఉంటే ప్రాణాలతో బతికేవాడు.. 


మంకీ ట్రాప్... మనందరికీ ఉంటుంది.✍️

-కే. రవీందర్ పటేల్, RSS

సనాతన హిందూ``` 

🧡 జై భారత్ 🇮🇳 జై హింద్ 💚

. *సర్వం శ్రీకృష్ణార్పణమస్తు*

                       🌷🙏🌷```

 🙏లోకా సమస్తా సుఖినోభవన్తు!🙏```

🍀🌺🍀🌺🍀🌺🍀🌺🍀🌺🍀

*రేపటి తరానికి బతుకు, భద్రత లతోపాటు భారతీయత కూడా నేర్పండి.*

                     ➖▪️➖


ముక్కు వెనుక వైద్య శాస్త్రానికే

 మనందరి ముక్కు వెనుక వైద్య శాస్త్రానికే తెలియని కొత్త అవయవం కనిపించిందా ??!! 

- అవును కనిపించింది.! ఇది సత్యం మీరు ఊపిరి తీస్తున్నంత నిజం.!!!  

.

ఆ వివరాలోకి మనం వెళితే... 

కొన్ని శతాబ్దాలుగా మనకు తెలిసిన మానవ శరీర నిర్మాణ శాస్త్రంలో (Anatomy) ఇది ఒక విప్లవాత్మకమైన మార్పు. నెదర్లాండ్స్ క్యాన్సర్ ఇన్‌స్టిట్యూట్ పరిశోధకులు మన ముక్కు వెనుక భాగంలో ఒక కొత్త జత లాలాజల గ్రంథులను కనుగొన్నారు.


1. ఇది ఎలా బయటపడింది?

సాధారణంగా చేసే శస్త్రచికిత్సల్లో ఇవి కనిపించలేదు. ప్రొస్టేట్ క్యాన్సర్‌ను గుర్తించడానికి ఉపయోగించే PSMA PET-CT అనే అత్యాధునిక స్కాన్ ద్వారా వీటిని గుర్తించారు. ఈ స్కాన్ చేసినప్పుడు లాలాజల గ్రంథులు స్పష్టంగా మెరుస్తాయి. అలా 100 మంది రోగులను పరీక్షించినప్పుడు, అందరిలోనూ ముక్కు వెనుక భాగంలో ఒకే చోట ఈ కొత్త గ్రంథులు ఉన్నట్లు శాస్త్రవేత్తలు గమనించారు.


2. వీటి పేరు మరియు ఉనికి

పేరు: వీటికి "టుబేరియల్ లాలాజల గ్రంథులు" (Tubarial Salivary Glands) అని పేరు పెట్టారు.


పరిమాణం: ఇవి సుమారు 1.5 అంగుళాల (3.9 సెంటీమీటర్లు) పొడవు ఉంటాయి.


స్థానం: ముక్కు లోపలి భాగం మరియు గొంతు కలిసే చోట (Nasopharynx), పుర్రెకు దగ్గరగా ఇవి దాగి ఉన్నాయి.


3. ఇన్నాళ్లూ ఇవి ఎందుకు కనిపించలేదు?

ఈ గ్రంథులు చాలా లోతైన భాగంలో, ఎముకల మధ్య అమరి ఉండటం వల్ల సాధారణ అల్ట్రాసౌండ్ లేదా MRI స్కాన్‌లలో ఇవి స్పష్టంగా తెలియవు. కేవలం ఆధునిక రేడియోధార్మిక స్కాన్‌ల వల్లనే వీటి ఉనికి ఇప్పుడు ప్రపంచానికి తెలిసింది.


4. దీని వల్ల కలిగే ప్రధాన వైద్య ప్రయోజనం

ఈ ఆవిష్కరణ ముఖ్యంగా క్యాన్సర్ రోగులకు ఒక వరం లాంటిది:


రేడియేషన్ నుండి రక్షణ: తల లేదా మెడకు క్యాన్సర్ వచ్చినప్పుడు ఇచ్చే రేడియేషన్ థెరపీలో, ఈ గ్రంథులు ఎక్కడున్నాయో తెలియక వైద్యులు వాటిపై కూడా రేడియేషన్ ఇచ్చేవారు.


దుష్ప్రభావాల నివారణ: ఆ గ్రంథులు దెబ్బతినడం వల్ల రోగులకు నోరు ఆరిపోవడం (Dry mouth), ఆహారం మింగలేకపోవడం, మాట్లాడటానికి ఇబ్బంది కలగడం వంటి సమస్యలు వచ్చేవి.


మెరుగైన చికిత్స: ఇప్పుడు వీటి ఉనికి తెలిసింది కాబట్టి, రేడియేషన్ ఇచ్చేటప్పుడు ఈ భాగానికి నష్టం కలగకుండా వైద్యులు జాగ్రత్త పడవచ్చు. తద్వారా క్యాన్సర్ చికిత్స తర్వాత రోగులు త్వరగా కోలుకుంటారు.


ఈ పరిశోధన ఎలా జరిగింది?

నెదర్లాండ్స్‌లోని వైన్ వోగెల్ (Wouter Vogel) మరియు మ్యాథైస్ వాల్‌స్టార్ (Matthijs Valstar) అనే ఇద్దరు పరిశోధకులు ఈ ఆవిష్కరణకు నేతృత్వం వహించారు. వీరు వందలాది స్కాన్‌లను పరిశీలించడమే కాకుండా, ఈ కొత్త గ్రంథుల ఉనికిని నిర్ధారించడానికి మృతదేహాలను (Cadavers) చాలా సూక్ష్మంగా విడదీసి (Dissection) పరీక్షించారు. ఆ పరీక్షలో ఆ గ్రంథులు ముక్కు వెనుక భాగంలోని కణజాలానికి అతుక్కుని ఉండటం గమనించారు.


ఇది అధికారికంగా ఆమోదించబడిందా?

అవును, ఈ పరిశోధన ప్రపంచ ప్రఖ్యాత మెడికల్ జర్నల్ 'రేడియోథెరపీ అండ్ ఆంకాలజీ' (Radiotherapy and Oncology) లో ప్రచురితమైంది. ప్రపంచవ్యాప్తంగా ఉన్న అనాటమీ నిపుణులు ఇది ఒక ముఖ్యమైన ఆవిష్కరణగా గుర్తించారు.


మన శరీరంలో ఉండే ఇతర లాలాజల గ్రంథులు:

ఈ కొత్త గ్రంథులతో కలిపి ప్రధాన లాలాజల గ్రంథుల జాబితా ఇప్పుడు ఇలా ఉంది:


పరోటిడ్ గ్రంథులు (Parotid glands): ఇవి చెవుల కింద ఉంటాయి.


సబ్‌మాండిబ్యులర్ గ్రంథులు (Submandibular glands): ఇవి దవడ కింద ఉంటాయి.


సబ్‌లింగువల్ గ్రంథులు (Sublingual glands): ఇవి నాలుక కింద ఉంటాయి.


టుబేరియల్ గ్రంథులు (Tubarial glands): ముక్కు వెనుక భాగంలో కొత్తగా కనుగొన్నవి.


ఇవే కాకుండా మన నోటి లోపల సుమారు 1,000 వరకు చిన్న చిన్న లాలాజల గ్రంథులు (Minor salivary glands) విస్తరించి ఉంటాయి.


ఈ ఆవిష్కరణ ఎందుకు అంత ఆశ్చర్యపరిచింది?

గత 200-300 ఏళ్లుగా మానవ శరీరంపై ప్రతి అంగుళం పరిశోధన జరిగిందని మనం భావించాం. ఆధునిక వైద్యశాస్త్రంలో ఇలాంటి ఒక ప్రధాన భాగం ఇన్నాళ్లూ కనుగొనబడకుండా ఉండటం శాస్త్రవేత్తలను సైతం ఆశ్చర్యానికి గురిచేసింది.

వేద ఆశీర్వచనం

 *నమస్తే సదా వత్సలే మాతృ భూమే*


*కలియుగాబ్ది 5126*

*శ్రీ శాలివాహన శకం 1947 స్వస్తి శ్రీ    చాంద్రమాన  విశ్వావసు నామ సంవత్సరం దక్షిణాయనము  - హేమంత ఋతువు - పుష్య మాసం - శుక్ల పక్షం - తృతీయ - శ్రవణం -‌‌  భౌమ వాసరే* (23.12.2025)


ప్రముఖ వేదపండితులు, తణుకు /తాలూకా ఇరగవరం వాస్తవ్యులు 

*బ్రహ్మశ్రీ గుళ్ళపల్లి శివశర్మ ఘనపాఠీ* *(9491391009, 9440091234)* గారి నేటి వేద ఆశీర్వచనం.





.🙏🙏 

భవదీయుడు

దశిక ప్రభాకరశాస్త్రి 

9849795167

----------------------------------------------

*పిల్లలకి బతుకుతో పాటు భారతీయత కూడా నేర్పండి*

22, డిసెంబర్ 2025, సోమవారం

బీచుపల్లి ఆంజనేయ స్వామి దేవాలయము

 

22 డిసెంబర్ 2025 నాడు నేను కార్యార్జినై గద్వాల వెళ్లడం జరిగింది కాగా గద్వాల నుంచి వస్తూ ఉంటే కృష్ణా నది ఒడ్డున ఉన్న బీచుపల్లి ఆంజనేయ స్వామి దర్శనం చేసుకుందామని అక్కడికి వెళ్లాను మీరు చూస్తున్నది స్వామి వారి దేవాలయ గాలిగోపురం

ధర్మం లేకుండా పూజ వ్యర్థమే

 పూజ – ధర్మం – అధర్మం : కలియుగంలో మనిషి చేసే అతిపెద్ద అయోమయం


పూజలు చేయడం తప్పు కాదు. పూజలను తిరస్కరించమని భగవద్గీత ఎక్కడా చెప్పలేదు. కానీ పూజలతోనే ధర్మం పూర్తయిందని అనుకోవడమే కలియుగంలో మనిషి చేసే అతిపెద్ద తప్పు. పూజ అనేది మార్గం మాత్రమే; గమ్యం కాదు. ధర్మం అనేది జీవితంలో ఆ మార్గం ద్వారా మనం చేరాల్సిన స్థితి.


పూజ అంటే దేవుడిని మార్చడం కాదు; మనిషిని మార్చుకోవడం. దేవుడికి మన దీపాలు అవసరం లేదు, మన మనస్సులోని చీకటి తొలగించుకోవడమే అవసరం. కానీ కలియుగ మనిషి పూజను తన తప్పులకు కవచంలా ఉపయోగిస్తున్నాడు. అన్యాయం చేసి దేవుడి ముందు క్షమాపణ అడగడం కాదు అసలు పూజ; అన్యాయం చేయకుండా ఉండే స్థితికి మనస్సును సిద్ధం చేసుకోవడమే నిజమైన పూజ.


భగవద్గీత స్పష్టంగా చెబుతుంది—కర్మ లేకుండా పూజ శూన్యం. పని చేయకుండా జపం చేస్తే అది ఆధ్యాత్మికత కాదు, పారిపోవడం. సమాజంలో బాధ్యతలు తప్పించుకుని, దేవాలయాల్లో గంటలు కొడితే అది భక్తి కాదు, భయం. గీత అడవికి వెళ్లమని చెప్పలేదు; యుద్ధభూమిలో నిలబడి కూడా యోగిగా ఉండమని చెప్పింది. అదే అసలైన సందేశం.


ఇతిహాసాలు మనకు ఒక కీలకమైన సత్యాన్ని చూపిస్తాయి—పూజలు చేసిన ప్రతివాడూ ధర్మవంతుడు కాడు. రావణుడు ఘోర తపస్సులు చేశాడు, బ్రహ్మదేవుడిని ప్రసన్నం చేశాడు, అపార శక్తిని పొందాడు. కానీ ఆ శక్తిని ధర్మానికి ఉపయోగించలేదు. అహంకారానికి ఉపయోగించాడు. అక్కడే పూజ అధర్మానికి సేవ చేసే సాధనంగా మారింది. దుర్యోధనుడూ పూజలు చేశాడు. కానీ పూజ అతని అహంకారాన్ని కరిగించలేదు; మరింత గట్టిపరిచింది.


ఇక్కడే ఒక ముఖ్యమైన తేడా తెలుస్తుంది. పూజ మనలోని అహంకారాన్ని తగ్గిస్తే అది ధర్మానికి దారి. అదే పూజ మనలోని అహంకారాన్ని పెంచితే అది అధర్మానికి బలంగా మారుతుంది. పూజ ఫలితం మనిషిని ఎలా మార్చిందన్నదే అసలు ప్రమాణం. దేవుడి ముందు తల వంచి, బయటికి వచ్చాక బలహీనుడిని తొక్కితే—ఆ పూజ అసంపూర్ణమే కాదు, ప్రమాదకరం కూడా.


పురాణాల్లో పూజ, తపస్సు, యజ్ఞాలు అన్నీ ఒకే విషయాన్ని సూచిస్తాయి—నియంత్రణ. ఇంద్రియ నియంత్రణ, కోప నియంత్రణ, అహంకార నియంత్రణ. ఈ నియంత్రణ లేకుండా చేసే పూజ మనిషిని పవిత్రం చేయదు. శక్తిని మాత్రమే ఇస్తుంది. శక్తి + ధర్మం కలిస్తే దేవత్వం వస్తుంది. శక్తి + అహంకారం కలిస్తే రాక్షసత్వం వస్తుంది. కలియుగంలో ఈ రెండింటి మధ్య తేడా చాలామంది మరిచిపోయారు.


ఇప్పుడు ధర్మం అంటే ఏమిటో చూద్దాం. ధర్మం అంటే దేవుడి పేరు పలకడం కాదు; దేవుడి లక్షణాలను జీవితంలో చూపించడం. సత్యం, కరుణ, న్యాయం, బాధ్యత, సహనం—ఇవే ధర్మ లక్షణాలు. పూజ చేసి కూడా అబద్ధం చెప్పడం, మోసం చేయడం, అన్యాయం చేయడం కొనసాగితే—ఆ పూజ మన జీవితాన్ని తాకలేదు అన్నమాట.


అధర్మం ఎప్పుడూ బహిరంగంగా రావడం లేదు. చాలాసార్లు అది పూజతోనే కప్పబడి వస్తుంది. “నేను భక్తుడిని”, “నేను దేవుడిని నమ్ముతాను” అనే మాటల వెనుక దాగి అధర్మం నడుస్తుంది. కలియుగంలో అధర్మం ఖడ్గం పట్టుకుని రావడం లేదు; పూలమాల వేసుకుని వస్తోంది. ఇదే అత్యంత ప్రమాదకరమైన రూపం.


భగవద్గీత ఈ మోసాన్ని బాగా గుర్తించింది. అందుకే గీత భక్తిని కూడా ప్రశ్నించింది. “నీవు నన్ను ఎంత ప్రేమిస్తున్నావు?” అని కాదు, “నీవు నీ కర్తవ్యాన్ని ఎంత నిజాయితీగా చేస్తున్నావు?” అని అడిగింది. గీతలో భక్తి అనేది భావోద్వేగం కాదు; అది కర్తవ్యబద్ధత. అదే కారణంగా గీత కలియుగానికి ఇంకా ఎక్కువగా అవసరం.


కలియుగంలో పూజలు పెరిగాయి, కానీ ధర్మం తగ్గింది అన్న విమర్శకు కారణం ఇదే. మనం దేవుడిని మన తప్పులను సమర్థించేవాడిగా మార్చుకున్నాం. దేవుడు మన పక్షాన ఉండాలని కోరుకుంటున్నాం; కానీ మనం ధర్మం పక్షాన నిలబడటం లేదు. ఇది పూజ ఉద్దేశాన్ని తలకిందులు చేసిన స్థితి.


నిజమైన పూజ మనిషిని మృదువుగా చేస్తుంది. మన మాటల్లో వినయం తీసుకువస్తుంది. మన నిర్ణయాల్లో న్యాయాన్ని పెంచుతుంది. మన చేతుల్లో బాధ్యతను పెంచుతుంది. పూజ చేసిన తర్వాత కూడా మనలో ద్వేషం, అసూయ, కక్ష అలాగే ఉంటే—ఆ పూజ ఇంకా ప్రారంభ దశలోనే ఉంది.


చివరికి ఒక స్పష్టమైన సత్యం. పూజ ధర్మానికి ప్రత్యామ్నాయం కాదు. పూజ ధర్మానికి సిద్ధం చేసే సాధనం మాత్రమే. పూజ లేకుండా ధర్మం కష్టం కావచ్చు; కానీ ధర్మం లేకుండా పూజ వ్యర్థమే. ఈ రెండూ కలిసినప్పుడే జీవితం సమతుల్యంగా మారుతుంది. దేవుడికి దగ్గరవ్వాలంటే ఆలయానికి వెళ్లడమే కాదు—మనిషిగా నిలబడటమే అసలైన పూజ.


కొంపెల్లి లింగం గౌడ్

అడ్వకేట్ | హై కోర్ట్, హైదరాబాద్

పంచ రంగనాధ క్షేత్రాలు..

 పంచ రంగనాధ క్షేత్రాలు....[ ధనుర్మాసం సందర్భంగా]

జలం ఏ పాత్రలోకి ఒంపితే, ఆ రూపాన్ని పొందుతుంది. భగవంతుడు కూడా అంతే! భక్తులు ఏ రూపంలో ఆయనను కొలుచు కోవాలనుకుంటే.... ఆ రూపంలోకి ఇమిడిపోతాడు. అలా ఆదిశేషుని మీద శయనించే విష్ణుమూర్తిని, రంగనాథస్వామిగా కొల్చుకోవడం కద్దు. దక్షిణాదిన ఈ రంగనాథ స్వామి ఆలయాలు చాలానే కనిపిస్తాయి. వాటిలో పంచరంగ క్షేత్రాల గురించి చెప్పుకోవాల్సిందే. కావేరీ తీరాన వెలసిన ఈ పంచరంగ క్షేత్రాలు తమిళ, కన్నడ ప్రజలకు చాలా ప్రత్యేకం. ఆ పంచరంగ క్షేత్రాల వివరాలు ఇవిగో…

 

శ్రీ రంగపట్నం:– ఈ పేరు వినగానే మనకు టిప్పు సుల్తాన్‌ కథలే గుర్తుకువస్తాయి. టిప్పు రాజ్యానికి రాజధానిగా సాగిన ఈ పట్నానికి ఆ పేరే అందులోని రంగనాథుని ఆలయం మీదుగా వచ్చింది. ఇక్కడి శ్రీదేవి, భూదేవి సహిత రంగనాథుని ఆలయానికి వెయ్యేళ్లకు పైగా చరిత్ర ఉంది. పశ్చిమ గాంగేయుల కాలంలో నిర్మించిన ఈ ఆలయానికి టిప్పు సుల్తాన్‌ సహా కర్ణాటక ప్రాంతాన్ని ఏలిన రాజులంతా ఈ స్వామి అనుగ్రహం కోసం ప్రార్థించినవారే!

 

తిరుప్పునగర్‌:– తమిళనాడులోని తిరుచిరాపల్లికి సమీపంలో ఉందీ గ్రామం. ఇందులోని స్వామి పేరు ‘అప్పకుడతాన్‌ పెరుమాళ్‌’. ఇక్కడ ఉభమన్యు అనే రాజుకి విష్ణుమూర్తి ఒక ముసలివాని రూపంలో దర్శనమిచ్చాడట. ఆయనకు ఎంత ఆహారాన్ని అందించినా ఆకలి తీరలేదట. చివరికి పరాశర మహర్షి సూచనతో భక్తితో అప్పాలని అందించినప్పుడే తృప్తి లభించిందట. అప్పటి నుంచి ఈ స్వామికి అప్పకుడతాన్ స్వామి అని పేరు. పంచరంగ క్షేత్రాలలోనే కాకుండా వైష్ణవుల 108 దివ్యదేశాలలో ఒకటిగా కూడా ఈ ఆలయాన్ని ఎంచుతారు.


కుంబకోణం:– ఒకప్పుడు హేమ రుషి అనే ఆయన సాక్షాత్తు లక్ష్మీదేవి తన కుమార్తెగా జన్మించాలని తపస్సుని ఆచరించాడట. దాంతో లక్ష్మీదేవి ఒక తటాకంలోని కలువల నుంచి ఉద్భవించింది. అలా అవతరించిన లక్ష్మీదేవిని కోమలవల్లి అన్న పేరుతో కొలుచుకున్నారు. లక్ష్మీదేవి చెంత ఆ విష్ణుమూర్తి కూడా ఉండాల్సిందే కదా! ఆయన కూడా భువికి అవతరించాడు. ఇలా అవతరించిన స్వామిని అరవముదన్ లేదా సారంగపాణి అని పిల్చుకుంటారు.

 

మయిలదుతురై:– చంద్రుని తపస్సుకి మెచ్చి ఆ విష్ణుమూర్తి అవతరించిన చోటు ఇది. పరాకల్‌ అనే ఆళ్వారుని భక్తికి మెచ్చి స్వామివారు ఇక్కడే స్థిరపడిపోయారట. అలా చూసుకున్నా ఈ ఆలయానికి వెయ్యేళ్లకు పైగా చరిత్ర ఉన్నట్లు తోస్తుంది. ఇక్కడి స్వామి పేరు ‘పరిమళ పెరుమాళ్‌’. వైష్ణవుల 108 దివ్యదేశాలలో ఒకటైన ఈ ఆలయానికి మరో విశిష్టత కూడా ఉంది. ఈ స్వామివారి అనుగ్రహంతోనే నాదస్వరం ఒక సంగీత వాయిద్యంగా రూపుదిద్దుకుందని చెబుతారు.

 

శ్రీ రంగం:– పంచరంగ క్షేత్రాలలో శ్రీరంగాన్ని ఆద్యరంగం (చివరి క్షేత్రం)గా పిలుస్తారు. కానీ అన్నింటిలోకీ ప్రముఖమైనది ఈ ఆలయమే! విష్ణుమూర్తి చేతిలో ఉన్న శంఖు రూపంలా తోచే ఒక చిన్న ద్వీపం మీద ఈ ఆలయం నిర్మితమైంది. ఇక్కడి మూలవిరాట్టుని సాక్షాత్తు విభీషణుడు ప్రతిష్టించినట్లు చెప్పుకొంటారు. విష్ణుభక్తిలో శ్రీరంగానికి ఉన్న ప్రత్యేకత ఎంత చెప్పుకున్నా తక్కువే! గోదాదేవి విష్ణుమూర్తిని వివాహం చేసుకున్నది ఇక్కడే! ప్రస్తుతం ఉన్న ఆలయాన్ని నిర్మించడానికే 300 ఏళ్లకు పైగా సమయం పట్టిందని చెబుతారు. ప్రపంచంలోనే అతి ఎత్తైన గోపురంగా ప్రసిద్ధకెక్కిన ఈ ఆలయాన్ని దర్శించకుంటే సర్వశుభాలూ కలుగుతాయని నమ్మకం.

 

ఇవీ పంచరంగ క్షేత్రాల విశేషం. కొన్ని జాబితాలలో ఇందులోని కుంబకోణం బదులు వటనగరంలోని రంగనాథ పెరుమాళ్‌ ఆలయాన్ని పేర్కొంటూ ఉంటారు.🙏