నరసింహ శతకంలోని 71వ పద్యం

  *ఓం శ్రీ లక్ష్మీ నరసింహాయ నమః* 

🙏🙏🙏

తేదీ 06/02/2026 శుక్రవారం ధర్మపురి శేషప్ప (కాకుస్థం శేషాచలదాసు) విరచితం నరసింహ శతకంలోని 71వ పద్యం పారాయణం చేద్దాం.

సీ. ప్రహ్లాదుఁడేపాటి పైడికానుకలిచ్చె? 

మదగజంబెన్నిచ్చె మౌక్తికములు?

నారదుండెన్నిచ్చె నగలు రత్నంబుల 

హల్యనీకే యగ్రహారమిచ్చె?

ఉడుతనీకేపాటి యూడిగంబులు చేసె?   

ఘన విభీషణుడేమి కట్నమిచ్చె?

పంచపాండవులేమి లంచమిచ్చిరి నీకు? 

ద్రౌపది నీకెంత ద్రవ్యమిచ్చె?

తే. నీకు వీరందఱయినట్లు నేను గాన? 

యెందుకని నన్ను రక్షింపవిందువదన!

భూషణవికాస! శ్రీధర్మపురనివాస! 

దుష్టసంహార! నరసింహ! దురితదూర!

 భావం:- ఓ నరసింహా! ప్రహ్లాదుడు నీకు ఎన్ని బంగారు కానుకలు ఇచ్చాడు? మదపుటేనుగు ఎన్ని ముత్యాలు ఇచ్చింది? నారదుడు నగలు, రత్నాలు ఎన్ని ఇచ్చాడు? అహల్య నీకు ఏ అగ్రహారం ఇచ్చింది? ఉడుత నీకు ఏ పాటి సేవలు చేసింది? ఘనుడైన విభీషణుడు ఏమి కట్నం ఇచ్చాడు? పంచ పాండవులు ఏమి లంచం ఇచ్చారు? ద్రౌపది నీకు ఎంత ద్రవ్యం ఇచ్చింది? వీరందరి లాగా నేను కాదా? నన్ను ఎందుకు రక్షింపవు? ఓఇందువదనుడా! అంటూ విష్ణువు అభిమానం సంపాదించిన వారందరినీ చూపుతూ, తాను వారిలాగా కాదా? అని ప్రశ్నించడం శేషప్పకే చెల్లుతుంది!