21, జనవరి 2025, మంగళవారం

కంకంటి పాపరాజు పాత్రచిత్రణ!

 శు భో ద యం🙏


కంకంటి పాపరాజు పాత్రచిత్రణ!


తెనుగున వెలసిన ఉత్తరరామాయణము కావ్యములలో  కంకంటి వారిరచనకే ప్రచారమధికము. దానికి వారి రచనావిధానమే ననుట యదార్ధము.

        సీతాపరిత్యాగఘట్టమున

వాల్మీకి ఆశ్రమమున ఆశ్రమునొందిన సీతజీవన విధానమును చదివినవారు కంటతడిబెట్టకుండ నుండుటరిదియే!


"*రంగారు బంగారు చెంగావులు ధరించు*

శృంగారవతి నారచీర లూనె.

భూజనంబులు మెచ్చు భోజనంబులొనర్చు

కమలాక్షి 

కందమూలములు నమలె.

చంద్రకాంత విశాల 

చంద్రశాలల నుండు

జవ్వని 

మునిపర్ణ శాల నుండె.

మరులుతో 

శ్రీరామునురముపై బవళించు

బాలికామణి 

యొంటి పవ్వళించె.

కనుసన్నల 

శుద్ధాంత కాంత లాచరించు

సేవలు మెచ్చని 

కాంచనాంగి, యొగ్గె 

ముని ముగ్ధ కాంతా కృతోపచార విధికి, 

నెంచ,న సాధ్యంబు 

విధికి గలదె?


       🙏🙏🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷🌷

సత్యం--ఋతం

 సత్యం--ఋతం 

సత్యం అంటే అందరికీ తెలుసు,  కానీ మనకు తెలిసిన సత్యం వేరు, వేదంలో ఆ పదానికి చెప్పిన అర్థం వేరు. 

  ఋతం అంటే ఏమిటి?  ఋతం అనే పదం ఒక్క వేదం లో మాత్రమే వస్తుంది.  కానీ దీనికి చాలా ప్రాముఖ్యత ఉంది.

సత్యం, ధర్మం లకు ఎంత ప్రాశస్త్యత ఉందో, ఋతానికీ అంతే ప్రాశస్త్యత ఉంది. 

శాస్త్రములలో విధించిన కర్మలను మన బుద్ధి శక్తితో బాగా విశ్లేషించి, అంతటితో ఆగకుండా, ఆయా కర్మలు మహాత్ములు ఎవరైనా చేశారా అన్నది వివేచించి పోల్చి చూసి, ’ ఇది చేయవచ్చును,  లేదా.. ఇది చేయకూడదు ’ అని నిశ్చయించుకొనుటే ఋతం 

ఆ నిశ్చయాన్ని వాక్, కర్మేంద్రియాలతో ఆచరణలో పెట్టడాన్ని సత్యం అంటారు .

ఈ ఋతము, సత్యము, స్వాధ్యాయము, ప్రవచనము--[ ఇవి కాక, తపము, దమము, శమము, లాంటి మరికొన్ని ఉన్నాయి. వాటిని ఇక్కడ చేర్చలేదు ]  ఇవన్నీ కూడా తప్పక ఆచరించవలసినవి అని ఉపనిషత్ చెపుతుంది. ఎందుకు చెపుతుంది అంటే, బ్రహ్మము గూర్చిన జ్ఞానము,  ఉపాసనల వల్ల బ్రహ్మప్రాప్తి కలుగుచున్నపుడు మిగతావాటిని ఉపేక్షిస్తారేమో అని  అలా ఉపేక్షించకూడదు అని చెపుతుంది. 

ఇప్పుడు పైవాటిలో " ప్రవచనము " ఒక్క దాన్ని మాత్రమే తీసుకుందాము. 


*ప్రవచనము కూడా బ్రహ్మజ్ఞాని ముఖ్య కర్తవ్యాలలో ఒకటి. అంటే ప్రవచనము చెప్పేవాడు జ్ఞాని అయి ఉండాలి. అది ప్రథమ నియమము. అదికాక, ఇతర అనుష్ఠానములు చక్కగా చేస్తుండాలి. అతడే ప్రవచనానికి అర్హుడు.  కాబట్టి, వేదాభ్యాసము, స్వాధ్యాయము, ఋతము, తపస్సు, సత్యము ఇవన్నీ ఆచరిస్తున్నవాడే ప్రవచనాలు చెప్పుటకు అర్హుడు.*  


ఆ ప్రవచనాల్లో చెప్పే విషయాలు పై కర్మలద్వారా ఆచరించబడి చక్కగా తెలుసుకొని ఉండాలి. 

ఋతం అంటే, ఏది కర్తవ్యము, ఏది కాదు అన్న జ్ఞానము కదా... ఇదే కదా ప్రవచనాల్లో చెప్పేది?   ఈ జ్ఞానమెలా వస్తుంది?  ఏది చేస్తే శ్రేయస్సు కలుగుతుందో--- అది మంచిది. అదే కర్తవ్యము. ఏది చేస్తే మొదట సుఖంగా అనిపించినా, తర్వాత క్లేశాన్ని కలిగిస్తుందో-- అది చేయరానిది. దీనికొక పేరుంది. అదే ప్రేయస్సు. 

శ్రేయస్సు--ప్రేయస్సు అని రెండున్నాయని తెలిసింది కదా

శ్రేయస్సంటే మంచిది, ఎప్పటికీ శుభాన్ని కలిగించేది. ప్రేయస్సంటే మంచిది కాదు, మొదట సుఖాన్ని ఇచ్చినా తర్వాత అశుభాన్ని, కష్టాన్ని, క్లేశాన్ని కలిగించేది. 

ఈ శ్రేయస్సు--ప్రేయస్సు లను గురించి నేను అనువాదం చేసిన " మహా దర్శనము " చదివినవారికి విదితమే. 

శ్రేయస్సు అనేది మనకు నచ్చకపోవచ్చు. కానీ చివరికి శుభాన్నే కలిగిస్తుంది

ప్రేయస్సు మనకు బాగా నచ్చుతుంది.. కానీ చివరికి దుఃఖాన్ని మిగిలిస్తుంది.

ఇదంతా తెలిసినవాడే సరైన ప్రవచనకారుడు. ఋతాన్ని, స్వాధ్యాయాన్ని, ప్రవచనాన్ని అజాగ్రత్త చేయకూడదు అని కూడా వేదము చెబుతుంది.  ఇతర లాభాలు,  ప్రయోజనాల కోసం మోహము చెంది, ఋతమేది, సత్యమేది, శ్రేయస్సేది, ప్రేయస్సేది అని పట్టించుకోకుండా స్వంతలాభం కోసం అశాస్త్రీయమైన దాన్ని చెప్పేవాడికి అమిత దుఃఖం మిగులుతుంది. 

// జై జగదంబే //

మహాభారతం

 మహాభారతం - శాంతి పర్వం 🙏

                   ఐదవ భాగం 

 ఎందరు ఎంత చెప్పినా ధర్మరాజు మనసు మారలేదు. అప్పుడు వ్యాసుడు ధర్మరాజు తో " ధర్మరాజా ! అర్జునుడి మాటలు అక్షరసత్యాలు. అన్ని ధర్మములలోకి గృహస్థధర్మం గొప్పది. మానవులకే కాక పశుపక్ష్యాదులకు అది ధర్మమే. క్షత్రియులకు గృహస్థధర్మము తప్ప మిగిలిన తపస్సు, ఇంద్రియనిగ్రహం, బ్రహ్మచర్యం ఆచరణ యోగ్యం కాదు. ధనం సంపాదించకుండా ఉండటం, ప్రజారక్షణ మరవడం, యుద్ధం చేయకుండా పారిపోవడం క్షత్రియులకు మహాపాతకం. ఇది వేదవాక్కు కనుక వేదమార్గాన నడిచి ఈ భూమిని జనరంజకంగా పాలించు. ధర్మజా ! నీవు గురువుల వద్ద విద్యను అభ్యసించి ధర్మసూక్ష్మాలను చక్కగా ఎరిగిన వాడివి నీవు వర్ణాశ్రమ ధర్మములు తెలియని వాడివా ! భూమిని పాలించే రాజుకు దండనీతి తప్ప వేరు మార్గం లేదు. నీకు సద్యుముడు ఎలా దండనీతిని అమలు పరచి దుష్టులను శిక్షించి చివరకు మోక్షం పొందాడో తెలియాలి. ఆ కథ నీకు వివరిస్తాను.


పూర్వం బహుదానదీ తీరంలో లిఖితుడు, శంఖుడు అనే ఇద్దరు బ్రాహ్మణ సహోదరులు ఉన్నారు. ఇద్దరూ ధర్మతత్పరులు. వారి ఆశ్రమంలో కాయలు, పండ్లు సమృద్ధిగా ఇచ్చే వృక్షాలు అనేకం ఉన్నాయి. ఒక రోజు శంఖుడు ఇంట్లో లేనప్పుడు లిఖితుడు ఆశ్రమంలో ఉన్న చెట్ల నుండి బాగా పండిన పండ్లలను కోసి తింటున్నాడు. అప్పుడు శంఖుడు అక్కడకు వచ్చి " ఈ పండ్లు ఎక్కడివి " అని అడిగాడు. లిఖితుడు " మీ చెట్లో కోసుకున్నాను " అన్నాడు. శంఖుడు " నా అనుమతి లేకుండా నా చెట్టు నుండి పండ్లు కోయవచ్చా ! అది దొంగతనం కాదా ! నీకు పాపం అంటింది. రాజదండనతో కాని ఆపాపం పోదు " అన్నాడు. వెంటనే లిఖితుడు రాజు వద్దకు వెళ్ళి వార్తాహరుల ద్వారా తన రాకను తెలియజేసి రాజును మంత్రులతో వెలుపలకు రప్పించాడు . సుద్యుమ్నుడు " విప్రోత్తమా ! మీరు ఇక్కడకు వచ్చిన కారణమేమి ? ఆజ్ఞాపించిన మీరు చెప్పినట్లు చేస్తాను " అని అన్నాడు. అందుకు లిఖితుడు " రాజా ! మీరు మాటతప్పక నేను చెప్పినట్లు చేయాలి. నేను నా సోదరుడి ఆశ్రమం లోని పండ్లను దొంగిలించాను. దానికి మీరు తగిన శిక్ష విధించి నన్ను పాప విముక్తిడిని చెయ్యండి " అని ప్రార్థించాడు. ఆమాటలకు చాలాబాధను అనుభవించిన రాజు ఇక తప్పదనుకుని లిఖితుడి చేతులు నరకమని దండన విధించాడు. లిఖితుడు రాజుకు దీవించి వెళ్ళాడు. అతడికి దండన అమలుజరిగింది. లిఖితుడు శంఖుడి వద్దకు వెళ్ళి తన తెగినచేతులు చూపి " నేను దండన అనుభవించాను " అన్నాడు. శంఖుడు సంతోషించి " లిఖితా ! ఎవరూ ధర్మమార్గం, తప్పకుడదు. నీ జీవితం ధన్యమైంది. నీవు బహుదానదికి వెళ్ళి దేవతర్పణములు, పితృతర్పణములు విడిచి పెట్టు. లిఖితా ! కల్లుత్రాగడం, గురుపత్నిని కామించడం, బ్రాహ్మణుల సొత్తు అపహరించడం ఇవి మహా పాతకములు. ఈ మహా పాతకములలో ఏ ఒక్కటి ఎవరు చేసినా అది బ్రాహమణుడైనా దండనార్హుడే. రాజు చేత దండింపబడిన వారు పుణ్యలోకాలకు పోతాడు. నీవు కూడా రాజదండన అనుభవించావు కనుక పుణ్యలోకాలకు పోతావు. అందుకు నీవు సంతోషించు " అన్నాడు. వెంటనే లిఖితుడు బహుదా నదికి వెళ్ళి తెగిన చేతులతో దేవతర్పణములు పితృతర్పణములు విడిచాడు. అతడు ఆశ్చర్యపడేలా అతనికి తిరిగి చేతులు వచ్చాయి. లిఖితుడు ఆనందంగా శంఖుని వద్దకు పరిగెత్తి పోయి శంఖుడికి తన చేతులు చూపాడు. శంఖుడు " ఇందుకు ఆశ్చర్యం ఎందుకు ? ఇది దైవకృప చేత నా తపోమహిమ చేత కలిగింది. నీవు నిర్మల మనస్కుడవు కనుక నీకు దైవానుగ్రహం కలిగింది. నిన్ను దండిచిన సుద్యుమ్న మహారాజు తన పితృదేవతలతో సహా పుణ్యాత్ములైయ్యారు " అన్నాడు.


వ్యాసుడు ఇంకా ధర్మరాజుతో " ధర్మజా ! నీవు కూడా తగిన విధంగా ప్రజారక్షణ కావించుము. నీ తమ్ములు చెప్పిన మాటలు వేదవాక్కు. రాజనీతి దండన చేత తప్ప మరొక విధంగా నిర్వర్తించబడ లేదు. కనుక నీవు శోఖమును వదిలి గొప్పగొప్ప యాగములు, యజ్ఞములు చేసి చక్కగా రాజ్యాన్ని పాలించు. ధర్మనందనా ! నీ తమ్ములు నీ భార్య నీమాట మన్నించి పన్నెండేళ్ళ అరణ్యవాసం ఒక ఏడు అజ్ఞాతవాసం చేసి కష్టములు అనుభవించారు. ఇప్పుడు నీవు వారి మాట మన్నించి వారికి సుఖశాంతులు కలుగచెయ్యి. విరాగి అయి అడవులకు వెళ్ళి దేవతలకు పితృదేవతలకు బాధ కలిగించకు. నీకు న్యాయశాసస్త్రం బాగా తెలుసు. ప్రజల మనోభిష్టం తెలుసుకుని శిష్టరక్షణ, దుష్టశిక్షణ చేసి దండనీతిని అమలు పరచే రాజుకు అన్నీ శుభాలే కలుగుతాయి. ప్రజల ఆదాయం నుండి ఆరవ భాగం పన్నుగావసూలు చెయ్యి. ప్రజలన్ము కన్నలబిడ్డల వలె పాలించు. ఇదే మోక్షముకు మార్గం చూపుతుంది. నీ మనసులో ఉన్న భయం సంశయం వదిలి పెట్టు. కాని ధర్మరాజా రాజు అహంకరించి కామ క్రోధవశుడై ప్రజాకంటకంగా పాలిస్తే అతడికి ప్రజలు చేసే పాపంలో నాల్గవభాగం లభిస్తుంది. శత్రువులను నిర్మూలించడం క్షత్రియ ధర్మం, పాపాత్ములైన రాజులతో సంధి చేసుకోవడం దోషం, శత్రువులతో సంధి చేసుకుని తన రాజ్యంలో కొంత భాగం ఇవ్వడం మంచిదికాదు. యుద్ధం చేసి రాజ్యరక్షణ చేయడం క్షత్రియ ధర్మమం. కనుక నీవు యుద్ధం చేసినందుకు చింతింప పని లేదు. దుర్యోధనుడితో సంధి చేసుకోక పోవడం వలన ఈ ఘోర యుద్ధం సంభవించింది అనుకోవడం నీ అవివేకం పూర్వం హయగ్రీవుడనే రాజు యుద్ధములు చేసి శత్రువులను జయించి, దుండగులను శిక్షించి. సన్మార్గులను రక్షించి, యజ్ఞయాగాదులు చేసి, ప్రజారంజకంగా పాలించి తుదకు సద్గతి పొందాడు. కనుక యుద్ధములు రాజులకు కీడు చెయ్యవు. యుద్ధంలో చావడం, చంపడం సహజం కనుక నీవు అనుమానం వదిలి సమర్ధులైన రాజోద్యోగులను నియమించి రాజ్యకార్యములు నిర్వహించుము " అన్నాడు.


ఇన్ని చెప్పినా కలత వీడని ధర్మరాజును చూసి అర్జునుడి గుండెలు రగిలిపోతున్నాయి. కాని మనసులో కోపందాచి నిలబడి ఉన్నాడు. ధర్మరాజు వ్యాసుడితో " ఓ మహర్షీ ! ఈ యుద్ధంలో ఎంతోమంది స్త్రీలు తమభర్తలను, కుమారులను, సోదరులను పోగొట్టుకున్నారు. వారి విలాపములు శోకసంతాపములు నా హృదయానికి నిద్రలేకుండా చేస్తున్నాయి. ఈ పరిస్థితిలో నేను ఈ రాజ్యమును ఎలా ఏలగలను ? " అన్నాడు.


వ్యాసుడు " ధర్మరాజా ! సుఖదుఃఖములు నీ వశంలో ఉన్నట్లు మాట్లాడుతున్నావు. దుఃఖాలు పొమ్మంటే పోవు, సుఖాలు రమ్మంటే రావు, ఈ లోకంలో అనుభవించే సుఖదుఃఖములకు హేతువు వారు పూర్వజన్మలో చేసుకున్న పాపపుణ్యాలే. అయినా ఈ సుఖదుఃఖములు శాశ్వతం కాదు. సుఖం వెంట దుఃఖం, దుఃఖం వెంట సుఖం వస్తూపోతూ ఉంటాయి. దుర్మార్గులకైనా కాలం కలిసివస్తే అనంత సుఖాలు ప్రాప్తిస్తాయి. ఎంతటి సుగుణవంతుడికి అయినా కాలం కలిసి రాకున్న సంపద లభించదు. కాలం కలిసి రాకున్న మంత్ర తంత్రములు పని చెయ్యవు. వర్షం, తాపం, చీకటి, వెన్నెల దైవ కల్పితములు. కమలం వికసించండం, చెట్లు పుష్పించుట, కాయలుకాయడం, పండ్లుపండడం ఋతు ధర్మం కాల మహిమ. జననం, వృద్ధిపొందుట, క్షీణించుట, మరణించుట కాల ధర్మమే. వీటి కొరకు నీవు దుఃఖించుట అవివేకం.

                  సశేషం 

సమర్పణ 

మారేపల్లి ఉదయ భాస్కర శర్మ

మోద మహానుభోగమున ముఖ్యమునైనది దు:ఖమే కదా*

 *మోద మహానుభోగమున ముఖ్యమునైనది దు:ఖమే కదా*

ఈ సమస్యకు నాపూరణ. 


సాదర భావయుక్తము నసాధ్యము  సాధ్యము లౌను చూచినన్


వాదములేల? సోదరుడ!  వాస్తవ మెంచి  సయోధ్యగా జనన్


మోద మహానుభోగమున  ముఖ్యమునైనది - దు:ఖమే కదా!


వేదిని నీరు గార్చునది - విక్లబమేర్పడు విడ్వరం బగున్.


(వేది =జ్ఞాని

విక్లబము =భయపడు, తొట్రువడు

విడ్వరము =ఉపద్రవము)


అల్వాల లక్ష్మణ మూర్తి.

16.01.2025,గురువారం శ్రీ క్రోధి నామ సంవత్సరం

 🙏జై శ్రీమన్నారాయణ🙏

16.01.2025,గురువారం


శ్రీ క్రోధి నామ సంవత్సరం

ఉత్తరాయనం - హేమంత ఋతువు

పుష్య మాసం - బహుళ పక్షం

తిథి:తదియ తె4.25 వరకు

వారం:బృహస్పతివాసరే 

(గురువారం)

నక్షత్రం:ఆశ్లేష మ12.03 వరకు

యోగం:ఆయుష్మాన్ రా2.14 వరకు

కరణం:వణిజ సా4.06 వరకు తదుపరి విష్ఠి తె4.25 వరకు

వర్జ్యం:రా12.43 - 2.24

దుర్ముహూర్తము:ఉ10.19 - 11.04 మరల మ2.45 - 3.29

అమృతకాలం:ఉ10.23 -12.03

రాహుకాలం:మ1.30 - 3.00

యమగండ/కేతుకాలం:ఉ6.0 - 7.30

సూర్యరాశి:మకరం

చంద్రరాశి: కర్కాటకం

సూర్యోదయం:6.39 సూర్యాస్తమయం:5.41


'ఎలా ఉన్నారు' అని మనం అడిగితే మిత్రుడు “ఏదో, అలా గడిచిపోతోంది' అన్నాడంటే, అతడి మెదడు స్తబ్ధంగా ఉందన్నమాట. వివేకం మందగించిందని, జ్ఞాపకశక్తి కూడా కోల్పోతున్నాడని అవగతం అవుతుంది. ఈ కోల్పోతున్న వాటన్నింటిని నిలబెట్టుకోవాలంటే కొత్తది వినాలి, కొత్తది చూడాలి, కొత్తది చదవాలి. అంతా సవ్యంగానే ఉన్నట్లు అనిపిస్తే మన ఆలోచనల్లో నూతనత్వం, ఆచరణలో వేగం తగ్గిపోతున్నాయని గమనించవచ్చు. కొందరికి మంచి ఆలోచనలు ఉంటాయి. తెలివి ఉంటుంది. ప్రణాళిక రచనా నైపుణ్యమూ ఉంటుంది. కానీ పని ప్రారంభించరు. ఆలోచనల పరంపర మాత్రం కొనసాగుతూనే ఉంటుంది. దీనివల్ల అతడికి లాభం లేదు. సమాజానికి మేలు జరగదు. ఇలా అన్నీ తెలిసి, ఏదీ చేయనివాడు, ఏదీ తెలియనివాడితోనే సమానం. మేధావులు మౌనంగా ఉంటే జాతికి ద్రోహం జరుగుతున్నట్లే!

సరదాగా నవ్వుకోవటానికి.

 సరదాగా నవ్వుకోవటానికి.😄

#భార్య భర్తల మీద ఏదన్నా ఒకటి రాయాలనుకున్నాను. 

భార్య, భర్తల మధ్య జరిగిన సంభాషణ మీ ముందు పెడతాను.

♦భార్య: మీకు ఏమి పని లేదా? మొదట చాగంటి గారి మహా భాగవతం విన్నారు, అది అయిపోంగానే మాడుగుల వారిది విన్నారు, 

తరువాత గరికిపాటి వారిది, ఇప్పుడు సుందర చైతన్యానంద స్వామి వారిది. ఎవరు చెప్పినా అదే మహా భాగవతం కథ కదా!

 ఒకరిది వింటే సరిపోదా?

♦భర్త: నువ్వు మినప్పిండి రుబ్బి మొదటి రోజు కొంచెం పిండిలో ఇడ్లీ రవ్వ కలిపి ఇడ్లీలు వేస్తావు,

 రెండో రోజు గారెలు, మూడో రోజు వడలు, నాలుగవ రోజు సాదా దోశలు, అయిదో రోజు కొంచెం ఉల్లిపాయ ముక్కలు వేసి ఉల్లి దోశ, 

ఆరో రోజు పొటాటో కూర వేసి మసాలా దోశ, 

ఏడో రోజు ఇంత టొమాటో, ఉల్లిపాయలు, పచ్చిమిర్చి ముక్కలు వేసి ఊతప్పమ్, 

ఎనిమిదో రోజు అదే పిండితో గుంట పునుగులు, 

తొమ్మిదో రోజు పుల్ల మజ్జిగ కలిపి పుల్లట్లు వేస్తూ ఉంటే నేను 

రేపు అనేది ఉందో లేదో అని ఆత్రంగా తినటం లేదా!

వీటన్నిట్లో ఉన్నది మినప్పిండి అని తెలిసినా ఎంజాయ్ చేస్తున్నామా లేదా? 

♦మహా భాగవతం కూడా అంతే! 

♦చాగంటి వారు చెప్పేదాంట్లో భక్తి పాలు ఎక్కువ - అందుకు వినాలి, ♦మాడుగల వారిది  ఎందుకంటే - ఆయన అమృత తుల్యమైన కంఠం లో పోతన గారి పద్యం వినటానికి,

♦ గరికిపాటి వారు ప్రస్తుతo సమాజం లో జరుగుతున్న వాటిని మేళవిస్తారు కాబట్టి ఆయనది వినాలి, 

♦చివరకు సుందర చైతన్యానందుల వారిది వినాలి - ఎందుకంటే  కలిపి కొట్టరా కావేటి రంగా అన్నట్టు ఆయన చెప్పే దాంట్లో పైన చెప్పినవి అన్నీ ఉంటాయి. 

♦ఒక్కొక్కరిది ఒక్కొక్క రకమైన పంథా. అన్నీ ఎంజాయ్ చేయాలి.

♦భార్యకు ఏమి అర్థం కాలా. తను చేసే పనిని భాగవతం తో పోల్చి పొగిడారా లేక ఒకే పిండితో వారం రోజులు టిఫిన్ చేసి పెడుతున్నాను అని ఎత్తి పొడుపుగా అన్నారా! ఆలోచనలో పడింది.🤔

కుంభ మేళా

 🔔 *కుంభ మేళా* 🔔


*మహా కుంభ మేళా కు వెళ్లేవారి కోసం మరిన్ని వివరాల* 


1.తెలుగు వాళ్లు అందరు మహాకుంభ  మేళా సందర్శనకి వెళ్లి వారు ట్రైన్ ద్వారా మాత్రమే వెళ్లండి ,బస్సు ద్వారా వెళ్తే  16 Km దూరం లో పోలీస్ లు ఆపేస్తారు, అక్కడ నుండి నడుచుకుంటూ మేళా కి వెళ్ళాలి.


2.కుంభం మేళా లకు వెళ్లినవారి సౌకర్యం కోసం ప్రభుత్వం వారు మేళా ని సెక్టార్ లు గా, కాటున్ పాండ్స్ గా, ఘాట్స్ గా విభజించారు వాటిపై అవగాహన పెంచుకుని వెళ్ళండి, లేక పోతే అస్సలు ఏమి అర్ధం కాదు, ఎటు వెళ్లి ఎటు వస్తారో మీకు అర్ధం కాదు.


3.మొత్తం 24 సెక్టర్స్ ఉంటాయి 

4.16-17కాటున్ పాండ్స్ ఉంటాయి. (నదికి మధ్యలో బ్రిడ్జి ల నిర్మించారు వాటినే కంటూన్ పాండ్స్ అంటారు )


4.ప్రయాగ రాజ్ ని మూడు గా విభజించారు 


A.జ్యూస్సి ,B.

 హరిలాగంజ్ C.సంగం 


5.నది కి కుడి వైపు జ్యూస్సి ఉంటుంది దీనిలో సెక్టర్ (12 నుండి 21 వరకు ఉంటాయి.


6.హరిలాగంజ్ ఇది నదిదాటి ఎడమ వైపు నా ఉంటుంది దీనిలో సెక్టార్ (5,11,10,9,8,7,6,18,19)ఉంటాయి.


7.ముఖ్యం మైంది, సంగం దీనిలో ఇది మెయిల్ రోడ్ కి దగరలో ఉంటుంది దీనిలో సెక్టార్ 3,4,ఉంటాయి.


8.మిగతావి 22,23, చాలా దూరం లో ఉంటాయి.


*వసతి సదుపాయం* 


9.సెక్టర్ 6 లో TTD వాళ్లు వెంకటేశ్వర స్వామి గుడి కట్టారు తప్పకుండా చూడండి. కానీ అక్కడ stay చేయనివ్వరు, స్వామి వారికీ బంగారు ఆభరణాలు ఉండడం వల్ల వాళ్ళు హై సెక్యూరిటీ పెట్టి ఎవరిని పడుకొనివ్వరు.


10.మీరు అక్కడ హిందీ వాళ్లవి పెద్ద పెద్ద పీఠాలకు సంబంధించి భజన కేంద్రాలు వున్నాయి చక్కగా అక్కడ పడుకోవచ్చు. (.ముఖ్యం గా సెక్టార్ 18లో స్టే చేయవాచ్చు నదికి 100 మీటర్లు లో ఉంటాయి.)


11.సెక్టర్ 19,18,20 ఈ సెక్టర్స్ లో నాగసాధువు లు, అఘోరాలు, వుంటారు వాళ్ళు దగ్గరికి వెళ్తే ఏంతో ప్రేమతో వారు తమ దగ్గరే ఉండ మంటారు ఇష్టముంటే ఉండొచ్చు.


12.సెక్టార్ 1లో ప్రవైట్ సదుపాయాలు ఉంటాయి రోజు కి 200 రూపాయలు 


13.అన్ని సెక్టార్ లో పెయిడ్ వసతులు కలవు రోజుకి 1000 -2000 తీసుకుంటారు( 4 మెంబర్స్ వరకు ఉండొచ్చు )..


భోజనం సదుపాయాలు 


14.మీకు అన్ని సెక్టార్ లలో ప్రసాదాలు, భోజనాలు నిరంతరం ఉంటాయి (ఉత్తర భారతదేశం వంటకలు అన్ని అక్కడ ఫ్రీ గా తిన్నవచ్చు…


హెల్ప్ లైన్ 


16.మీకు రైల్వే స్టేషన్ నుండి అడుగడుగునా పోలీస్ లు మీమల్ని గైడ్ చేస్తారు.


17.మేళా లో అయితే పోలీస్ లు అడుగడుగునా మన కు ఎటువైపు వేళలో చాలా బాగా చెప్తారు.


స్నానం ఎలా ??


18 ఎవరైతే కేవలం పుణ్య స్నానం చేసి రిటర్న్ అవ్వాలనుకుంటారో స్నాన ఘాట్ లు మెయిన్ రోడ్ పక్కనే ఉంటాయి వరుసగా.


19 2-3days వుండే వాళ్లు మాత్రమే ఎదో ఒక సెక్టార్ నదికి దగ్గరో వుంటుంది అక్కడే ఉండడం మంచిది, లేకపోతే నదికి, సెక్టార్ కి దూరమైత్ తప్పిపోయే అవకాశం కలదు 


నాగసాధువులు, అఘోరాలు, అఖడా లను చూడవచ్చు, వాళ్ళు ఆశీర్వదాలు తీసుకో వలనంటే సెక్టార్ 19,18,20 లో వుంటారు.


ఫ్యామిలీ తో వెళ్తే మాత్రం అక్కడ అన్ని తెలుసుకుని వెళండి, లేకపోతే చాలా ఇబ్బంది పాడుతారు.

ఒంటరి గా కంటే నలుగురు గా వెళ్తే చాలా మంచిది.


ఎన్నికోట్లమంది వచ్చినా సరిపోయేంత విశాల ప్రాంతం ప్రయాగం రాజ్.

🙏🏻🙏🏻🙏🏻🔔🔔🔔🙏🏻🙏🏻🙏🏻

తృటి అంటే ఏమిటి?

 తృటి అంటే ఏమిటి?

➖️🌺➖️🌺➖️🌺➖️

మనం అప్పుడప్పుడు వింటుంటాం.. పత్రికలలో చదువుతుంటాం..

 

" తృటి లో తప్పిన ప్రమాదం "  అని.. అసలీ తృటి అంటే ఏమిటి?

➖️➖️➖️➖️➖️➖️➖️➖️➖️➖️➖️➖️➖️➖️➖️

🌺మన పూర్వీకులు మన కాలాన్ని ఎన్ని భాగాలు గా విడదీసారొ,వాటి పేర్లేమిటో ఇప్పుడు తెలుసుకుందాం..


తృటి =సెకండ్ లో 1000 వంతు

➖️🙏➖️🙏➖️🙏➖️🙏➖️


100 తృటులు =1 వేద

3 వేదలు=1 లవం

3 లవాలు=1 నిమేశం అంటే రెప్ప పాటుకాలం నిముషం కాదు.. 

3 నిమేశాలు=1 క్షణం,

5 క్షణాలు=1 కష్ట

12 కష్టాలు = ఒక నిముషం 

15 కష్టాలు=1 లఘువు

15 లఘువులు=1 దండం

2దండాలు=1 ముహూర్తం

2 ముహూర్తాలు=1 నాలిక

7 నాలికలు=1 యామము,ప్రహారం

4 ప్రహరాలు=ఒక పూట

2 పూటలు=1 రోజు

15 రోజులు=ఒక పక్షం

2 పక్షాలు=ఒక నెల.

2 నెలలు=ఒక ఋతువు

6 ఋతువులు=ఒక సంవత్సరం.

10 సంవత్సరలు=ఒక దశాబ్దం

10 దశాబ్దాలు=ఒక శతాబ్దం.

10 శతాబ్దాల=ఒక సహస్రాబ్ది

100 సహస్రాబ్ది=ఒక ఖర్వ..లక్ష సంవత్సరాలు


🌺4లక్షల 32 వెల సంవత్సరాలు= కలియుగం


🌺8లక్షల 64 వేల సంవత్సరాలు=త్రేతాయుగం


🌺12లక్షల 96 వేల సంవత్సరాలు=ద్వాపర యుగం


🌺17లక్షల28 వేల సంవత్సరాలు=కృత యుగం


🌺పై 4 యుగాలు కలిపి=చక్రభ్రమణం.(చతుర్ యుగం)


🌺71 చక్రభ్రమాణాలు=ఒక మన్వంతరం


🌺14 మన్వంతరాలు=ఒక కల్పం


🌺200 కల్పాలు ఐతే=బ్రహ్మరోజు


🌺365 బ్రహ్మరోజులు =బ్రహ్మ సంవత్సరం


🌺100 బ్రహ్మ సంవత్సరాలు=బ్రహ్మసమాప్తి


🌺ఒక బ్రహ్మసమాప్తి=విష్ణుపూట


🌺మరో బ్రహ్మఉద్బవం=విష్ణువు కు మరో పూట


అదన్నమాట సంగతి.. 

మనము మన విజ్ఞానాన్ని తెలుసుకుందాం..

భావి తరాలకు తెలుపుదాం........

శ్రీ కార్త్యాయని దేవి ఆలయం

 🕉 మన గుడి : నెం 994


⚜ కేరళ  : చేర్యాల, అల్లెప్పి


⚜ శ్రీ కార్త్యాయని దేవి ఆలయం



💠 చెర్తల (చేర్యాల) అనేది ప్రస్తుత కేరళలోని అలపుజ సమీపంలోని పట్టణం . 

ఇక్కడ కార్త్యాయని ఆలయం ఉంది. 


💠 కార్త్యాయనీ దేవి ఆలయం, చేర్యాలలో ప్రధాన దేవత కార్త్యాయనీ దేవి మరియు అయ్యప్పన్ అయిన 'ధర్మ శాస్తా' ఉప దేవత కూడా ఈ ఆలయంలో ప్రాముఖ్యతను కలిగి ఉంది.  ఇక్కడ శివుడు మరియు కృష్ణుడు కూడా పూజింపబడతారు. 


💠 ఈ ఆలయానికి సంబంధించి ఒక కథ ప్రచారంలో ఉంది. విల్వమంగళం సావ్మియార్ తిరువనంతపురంలోని అనంతపద్మనాభ ఆలయాన్ని ప్రతిష్ఠించి గురువాయూర్‌కు తిరిగి వస్తున్నట్లు తెలుస్తోంది. 

అతను ఇప్పుడున్న చేర్యాలకు చేరుకుని ఒక తంబక చెట్టు క్రింద విశ్రాంతి తీసుకుంటున్నాడు. ఆ ప్రదేశంలో ఉన్న అనేక చెరువుల్లో అనేక హంసలు ఈత కొట్టడం గమనించాడు. అకస్మాత్తుగా అతను తంబాక చెట్టుకు కట్టి ఊయల ఊపుతూ ఒక దివ్య స్త్రీని చూశాడు. అతను ఆమెను కార్త్యాయనీ దేవతగా గుర్తించాడు మరియు ఆమె దగ్గరకు వెళ్లాడు, ఆ తర్వాత ఆమె సమీపంలోని చెరువులోకి దూకింది. 


💠 విల్వమంగళతు స్వామి ఆమె కోసం చెరువులో వెతికినా ఆచూకీ లభించలేదు. మరుసటి రోజు కూడా అతను ఆమెను అదే స్థలంలో చూశాడు మరియు ఈసారి ఆమె రెండవ చెరువులో దూకింది. 

ఇది ఆరు రోజుల పాటు కొనసాగింది. 

7వ రోజు, స్వామియార్ దేవి జుట్టును పట్టుకుని, ఆమె మునిగిపోయేలోపు ఆమెను పైకి లాగాడు. అతను ఆమె మెడను బహిర్గతం చేస్తూ ఆమె తల పైకి లాగగలడు. 

అలాగే, అతను పట్టుకున్న అనేక వెంట్రుకలు లేచిపోయాయి. 


💠 7వ ట్యాంక్ మలయాళంలో 'చెర్' అని పిలువబడే మురికి బురదతో నిండి ఉంది. 

ఈ సంఘటన కారణంగా ఆ ప్రదేశానికి చేర్యాల అని పేరు వచ్చింది. (ఇది కొబ్బరికాయల తయారీకి గొప్ప కేంద్రం కావడంతో బ్రిటిష్ వారు షెర్తాలా అని కూడా పిలిచేవారు) ప్రస్తుత విగ్రహానికి తల మాత్రమే కనిపిస్తుంది. వెంట్రుకలు బయటకు తీయబడిన ఈ రంధ్రాలను మీరు చూడవచ్చు.

 కాబట్టి అభిషేకం తర్వాత, తలని ఏర్పరుచుకునే విగ్రహం యొక్క ఈ భాగాన్ని వస్త్రాన్ని ఉపయోగించి తుడుచుకుంటారు. అలాగే అమ్మవారికి పుష్పాంజలి ఘటిస్తున్నప్పుడు ఈ భాగాలను ఒక గుడ్డతో కప్పుతారు. ఆమెను పట్టుకోలేకపోవడంతో స్వామియార్‌కు ఆమెపై కోపం వచ్చినట్లు తెలుస్తోంది. కాబట్టి, ఈ సంఘటనను గుర్తుచేసుకుంటూ, ఎడవం (మే-జూన్) నెలలో, ప్రజలు పూరం పండుగ సందర్భంగా దేవతను ఆటలాడుకుంటారు.


💠 'చేర్తల కార్త్యాయనీ దేవి' దేవత 'మాంగల్య దాయిని'గా ప్రసిద్ధి చెందింది, ఆమె తన భక్తులకు క్షేమం మరియు శ్రేయస్సును అందిస్తుంది మరియు యువతుల వివాహానికి అడ్డంకులను తొలగిస్తుంది.


💠 అరట్టు (తొట్టిలో స్నానం చేయడం) పండుగను ఎడవం (మే-జూన్) నెలలో 8 రోజుల పాటు జరుపుకుంటారు. 

ప్రతి రోజు అమ్మవారిని వేరే చెరువులో ముంచి ఎనిమిదవ రోజున ఆమెను విష్ణువు మరియు శివునితో కలిసి ఆలయానికి తీసుకువస్తారు .


💠 సాధారణంగా కేరళలోని ఇతర దేవాలయాలలో, వార్షిక పండుగ సమయంలో, 'ఆరట్టు' అనేది సంవత్సరానికి ఒకసారి జరిగే ఆచారం.  

చొట్టానికర దేవి ఆలయంలో, పండుగ సమయంలో ప్రతి రోజు ఆరాట్టు జరుగుతుంది.  మలయాళ మాసం వృచికంలో కార్తీక నక్షత్రం రోజు కూడా బాగా జరుపుకుంటారు.


💠 గర్భగుడిలోని అమ్మవారు నేల మట్టం క్రింద ప్రతిష్టించారు. అందువలన 'స్వయంభూ' అని నమ్ముతారు. 

విగ్రహం శివలింగం రూపంలో ఉంటుంది మరియు ఖచ్చితమైన రూపం లేదు. కార్త్యాయనీ దేవి కాకుండా, శివుడు , విష్ణువు , గణపతి , ధర్మశాస్త , నాగదేవతలు మొదలైన అనేక ఉప దేవతలు ఉన్నారు. ఈ ఆలయంలో కవుడయోన్ అని పిలువబడే ధర్మశాస్తాకు ఎక్కువ ప్రాముఖ్యత ఉంది. అతనికి ఇక్కడ తాడి అనే ప్రత్యేక నైవేద్యాన్ని ఇస్తారు .


💠 భక్తులు కార్త్యాయనీ దేవతకు నైవేద్యంగా కోళ్లను అందజేస్తారు. కాబట్టి మీరు ఈ ఆలయంలో అనేక కోళ్లను చూడవచ్చు. 


💠 అర్చన, రక్త పుష్పాంజలి (పుష్ప నైవేద్యాలు), స్వయంవర పుష్పాంజలి, ముజ్జుకప్పు (దేవుని చందనం పేస్ట్‌తో అలంకరించడం),  మొదలైన ఉపచారాలు చేస్తారు. 

శాస్తా స్వామికి 'నీరాజనం' మరియు 'ఆల్తాడి' అని పిలువబడే ప్రత్యేక నైవేద్యాన్ని నిర్వహిస్తారు.

 'వాళిపాడు' (నైవేద్యం) 'ఆల్తాడి'ని భక్తులు తమ శారీరక రుగ్మతలు తొలగిపోతాయనే నమ్మకంతో సమర్పిస్తారు.

 ' తలప్పోలి ' కూడా ఇక్కడ ఒక ముఖ్యమైన నైవేద్యంగా చెప్పవచ్చు: ఒక పుష్పంతో అలంకరించబడిన పళ్ళెంలో వెలిగించిన నూనె దీపం ఉంచబడుతుంది మరియు స్త్రీలు వాటిని దేవి ఊరేగింపులతో పాటు తీసుకువెళతారు.


💠 ఈ ఆలయంలో రెండు విశిష్టమైన మరియు విచిత్రమైన ప్రసాదాలు ఉన్నాయి. వాటిని ఇరట్టి మరియు తాడి అని పిలుస్తారు. 

ఇరట్టి దాని తయారీలో ఉపయోగించే బెల్లం కంటే రెట్టింపు పరిమాణంలో ఉండే నెయ్యి పాయసం తప్ప మరొకటి కాదు. 

తాడిని ఈ క్రింది పద్ధతిలో తయారు చేస్తారు:

బియ్యం పిండి, బెల్లం మరియు కొబ్బరి పొడి పొడి అల్లం మరియు ఇతర మసాలా దినుసులతో కలుపుతారు. ఇది తరువాత పేస్ట్ రూపంలో తయారు చేయబడుతుంది.

  

💠 కొచ్చిన్ అంతర్జాతీయ విమానాశ్రయం ఆలయానికి 101 కి.మీ దూరంలో ఉన్న సమీప విమానాశ్రయం


రచన

©️ Santosh Kumar

తిరుమల సర్వస్వం 123-*

 *తిరుమల సర్వస్వం 123-*

*తాళ్ళపాక అన్నమాచార్యుడు 11*


 *కార్యాలయ అధికారి నిర్వాకం* 


 విధివశాత్తూ, 1931వ సంవత్సరంలో మలయప్పస్వామి వారికి అప్పటి గద్వాల మహారాణి వారు వజ్రకిరీటం తయారు చేయించాలని సంకల్పించింది. ఆ కిరీటం తయారీ కార్యక్రమాన్ని పర్యవేక్షించడం కోసం సుబ్రహ్మణ్యశాస్త్రి గారు చెన్నపట్టణానికి తరలి వెళ్లారు. ఆ వ్యవధిలో ముద్రణా కార్యాలయాన్ని వేరే ప్రదేశానికి తరలించాల్సి రావడం వల్ల; దేవస్థానానికి చెందిన ముద్రణాలయ అధికారి ఒకరు, శాస్త్రిగారు మూడు టేకు పెట్టెలలో పదిలపరచిన వ్రాతప్రతులను చిత్తు కాగితాలుగా భ్రమించి, వాటిని తగులబెట్టించి, ఖాళీ పెట్టెలను కొత్త కార్యాలయానికి క్షేమంగా చేరవేశాడు. అలా శాస్త్రిగారి శ్రమ చాలా భాగం బూడిదలో పోసిన పన్నీరై పోగా, వారు అంతకుముందే పొందుపరచిన. మూడు సంపుటాలలో గల అతి కొద్ది సంకీర్తనలు మాత్రం మనకు మిగిలాయి.


 భాండాగారంలో బయటపడ్డ రాగిరేకుల లోని రకాలను, ఈ కీర్తనలను వెలుగులోకి తీసుకురావటం కోసం ఇంకెందరో మహానుభావులు చేసినట్టి అవిరళ కృషిని, తి.తి.దే. వారు చేపట్టిన *"అన్నమాచార్య ప్రాజెక్టు"* అనబడే బృహత్తర కార్యక్రమం గురించి సవివరంగా తెలుసుకుందాం.


 అన్నమాచార్యుని రచనలను వెలుగులోకి తెచ్చి, ఆధ్యాత్మిక-ధార్మిక-నైతిక విలువలతో కూడిన ఆ అమూల్యమైన సాహిత్యసంపదను తెలుగు జాతికి అందించిన వారందరినీ తలచు కోవడం, తెలుగువారిగా మనందరి కర్తవ్యం! ఒక్కొక్కరు చేసిన కృషి సంక్షింప్తంగా చెప్పుకున్నా ఒక్కో ఉదంతమవుతుంది. "చంద్రునికో నూలుపోగు" అన్న చందంలో, అతి క్లుప్తంగా, వారందరినీ కొన్ని వాక్యాల్లో పరిచయం చేయడానికే ఈ చిన్ని ప్రయత్నం.



 *పండిత విజయ రాఘవాచార్యులు* 


 సాధు సుబ్రహ్మణ్యశాస్త్రి గారు తయారుచేసిన కీర్తనల వ్రాతప్రతులు టేకు పెట్టెలలో భద్రపరచినంత వరకు పూర్తిగా భస్మీపటలమై పోగా, వారు ఇతరత్రా ప్రదేశాల్లో పదిలపరచి నటువంటి అతికొద్ది వ్రాతప్రతులను మాత్రం పండిత విజయ రాఘవాచార్యులు గారు ప్రచురించి వెలుగులోకి తెచ్చారు.



 *శ్రీ వేటూరి ప్రభాకరశాస్త్రి గారు* 


 ఆ తర్వాత 1945వ సంవత్సరంలో, తి.తి.దే. వారి ప్రాచ్యకళాశాలలో తెలుగుభాషా విభాగానికి అధ్యక్షునిగా ఉన్న శ్రీవేటూరి ప్రభాకరశాస్త్రి గారు, సుబ్రహ్మణ్యశాస్త్రి గారు చేపట్టిన మహాయజ్ఞాన్ని పునఃప్రారంభించి, రాగి రేకుల యందు నిక్షిప్తమై ఉన్న వేలాది కీర్తనలను జనబాహుళ్యం లోనికి తీసుకు వెళ్ళడంలో సఫలీకృతు లయ్యారు. అప్పటినుండి అన్నమాచార్య కీర్తనలు తిరుమల తిరుపతి దాటుకొని, ఆంధ్రదేశ మంతటా మాత్రమే కాకుండా, ఖండఖండాంతరాలకు విస్తరించి అన్నమయ్య ప్రతిభను, తెలుగునేల సౌభాగ్యాన్ని ప్రపంచమంతా చాటిచెప్పాయి.

ప్రభాకరశాస్త్రి గారు రాగిరేకుల నన్నింటిని రచయితల వారిగా వర్గీకరించి, కీర్తనలను రెండు సంపుటాలుగా ప్రచురించారు. *"అన్నమాచార్య చరిత్ర - పీఠిక"* అనే గ్రంథాన్ని రచించి, అప్పటివరకు మరుగున పడి ఉన్న అన్నమాచార్యుని జీవితచరిత్రను ప్రాభవాన్ని వెలుగులోకి తెచ్చారు.



 *శ్రీ రాళ్ళపల్లి అనంతకృష్ణ శర్మ గారు* 


 ఆ తర్వాత 1951వ సంవత్సరంలో, రాగిరేకుల లోని మరికొన్ని కీర్తనలను పఠన యోగ్యమైన ఈ నాటి తెలుగుభాష లోకి అనువదించే బృహత్తర కార్యాన్ని తి.తి.దే. వారు రాళ్ళపల్లి అనంతకృష్ణ శర్మ గారికి అప్పగించారు. వారు వేలాది కీర్తనలను దాదాపు 20 సంపుటాలుగా ప్రచురించి, వాటిలో 108 కీర్తనలకు స్వరాలు సమకూర్చి, వాటిని వినసొంపుగా తీర్చిదిద్దారు. ఇంతే కాకుండా , అన్నమయ్య సాహిత్యంలో అంతర్లీనంగా ఉన్న కొన్ని కన్నడ, తమిళ, సంస్కృత శబ్దాలను అందుబాటులో ఉన్న నిఘంటువుల సహాయంతో ఆంద్రీకరించారు. అన్నమాచార్యుడు తన


 ఆ కీర్తనలను రాగయుక్తం చేసిన ముప్ఫయ్యొక్క రాగాలను కూడా వెలుగులోనికి తెచ్చి తెలుగు సాహిత్యానికి ఎనలేని కృషి చేశారు. రాగయుక్తంగా పాడగలిగే సంగీతపరిజ్ఞానం లేని వారు, ఆ కీర్తనలను కేవలం పద్యాలుగా చదువుకొని; అందులోని చమత్కారాలను, సందేశాలను, సూక్తులను అర్థం చేసుకోగలిగినా చాలుననే లక్ష్యంతో రెండు దశాబ్దాలపాటు వారీ మహా యజ్ఞాన్ని చేపట్టారు.

*శ్రీనివాసుని శ్రీచరణాలను సేవిద్దాం, సకల శుభాలనూ పొందుదాం* 


*రచన* 

*పల్లపోతు కృష్ణ బాలాజీ గారు- వాణి శ్రీ దంపతులు*

ఫోన్ నెంబర్

99490 98406