అష్ట సిద్ధులు

 నిత్యాన్వేషణ:

అష్ట సిద్ధులు అంటే ఏమిటి? నేను ఆ శక్తిని ఎలా పొందగలను?

సిద్ధి అనగా శక్తి ని జాగృతి చేయడం. అష్ట సిద్ధులు అనగా ఎనిమిది రకాల సిద్ధులు(శక్తులు) హిందు పురాణాల ప్రకారం అష్ట సిద్ధులు: అణిమ, మహిమ, గరిమ, లఘిమ, ప్రాప్తి, ప్రాకామ్యం, ఈశత్వం, వశిత్వం. మొదట ఈ సిద్ధులు శ్రీ మహా విష్ణువు మరియు మహా శివుని వద్ద మాత్రమే ఉండేవి. వీరి నుండి విశ్వకర్మ ఈ సిద్ధులను పొంది తన కుమారుడైన సూర్య భగావానుడికి అనుగ్రహించాడు. ఆ తరువాత సూర్య భగావానుడు తన శిష్యుడైన హనుమంతుడికి ప్రసాదించాడు.

శ్లోకం:

*అణిమా మహిమా చైవ గరిమా లఘిమా తథా*

*ప్రాప్తిః ప్రాకామ్య మీశత్వం వశిత్వం చాష్ట సిద్ధయః*

*అణిమ:*

అణిమ సిద్ధి అనగా శరీరమును అణువు కంటే సూక్ష్మముగా మార్చడం అంటే శరీరమును చిన్నదిగా మార్చుట.

హనుమంతుడు లంకా నగరంలో ప్రవేశించినప్పుడు తన శరీరమును ఈ అణిమ సిద్ధిని ఉపయోగించే చిన్నగా మార్చాడు.

*మహిమ:*

ఈ సిద్ధి వలన శరీరమును అతి పెద్దగా మార్చవచ్చు.

హనుమంతుడు సీతమ్మ తల్లి జాడను వెతకడం కోసం లంక కీ వెల్లేటప్పుడు సముద్రాన్ని దాటడానికి తన శరీరాన్ని ఈ మహిమ సిద్ధిని ఉపయోగించే పెద్దగా మార్చాడు.

*గరిమ:*

గరిమ సిద్ధి అనగా శరీరము బరువును విపరీతముగా పెంచుట

*లఘిమ:*

లఘిమ సిద్ధి అనగా శరీరమును అతి తేలికగా చేయుట

ఈ సిద్ధిని ఉపయోగించి వాయుమార్గం లో తేలుతు ప్రయాణించవచ్చు. నీటిపైన నడువవచ్చు.

*ప్రాప్తి:*

ప్రాప్తి అనగా పొందడం. ఈ సిద్ధి వలన దేనినైన ఏ వస్తువునైన పొందవచ్చు.

*ప్రాకామ్యం:*

ఈ సిద్ధి వలన దూరదర్శనము, దూర శ్రవణము, వంటి దివ్య శక్తులు పొందవచ్చు అనగా మనమున్నచోటు నుండే ఇతర ప్రదేశాలలో ఏమి జరుగుతున్నదో చూడవచ్చు అక్కడి మాటలు వినవచ్చు.

*ఈశత్వం:*

ఈ సిద్ధి ద్వార ఎవరిపైనైనా, దేనిపైనైనా అధికారము పొందవచ్చు.

*వశిత్వం:*

ఈ సిద్ధి వలన అన్ని భూతములను, జీవులను లోబరచుకొనవచ్చు. అంటే సకల జీవరాశులు వారు చెప్పినట్లుగా ప్రవర్తిస్తాయి.

ఈ సిద్ధులను అష్టాంగ యోగ పద్దతి ద్వార సాధన చేసి కుండలినీ జాగృతం చేయడం ద్వార పొందవచ్చు. అయితే ఈ పద్దతి లో కుండలినీ జాగృతం చేయడం అన్నది అంత సులువు కాదు.దీనిని అర్హులైన గురువు సమక్షంలో మాత్రమే సాధన చెయ్యాలి అని మన శాస్త్రాలు చెప్పుతున్నాయి.

ఈ సిద్ధులను భక్తియోగం, ఙ్ఞాణయోగం ద్వార కూడ పొందవచ్చు.