రామాయణమ్ 319
...
మొదలయ్యింది లంకాదహనం.
.
ముందుగా తనను ప్రశ్నించిన ప్రహస్తుని ఇంటికి నిప్పు పెట్టాడు ,
ఆతరువాత మహా పార్శ్వుడి కొంపతగలబడ్డది ,
వంజ్రదంష్ట్ర
శుకసారణుల గృహాలవంతు వెంటనే వచ్చింది .
.
ఆ తరువాత ఇంద్రజిత్తు ఇంటికి నిప్పంటించాడు ,జంబుమాలి,సుమాలి,రశ్మికేతువు ,
సూర్యశత్రువు ఇలా వరుసగా రాక్షస యోధుల ఇళ్ళన్నీ అగ్నిదేవుడికి ఆహుతి ఇచ్చాడు.
.
ఒక్క విభీషణుడి ఇల్లు మాత్రమే వదిలి పెట్డి వరసపెట్టి అందరి ఇళ్ళు తగులబెట్టాడు మారుతి.
.
అందరి ఇళ్ళూ కాల్చి చివరగా రావణుడి ఇంటికి కూడా తన తోక చివరన ఉన్న అగ్నిని అంటించి సింహగర్జన చేశాడు వాయునందనుడు.
.
మిత్రులిరువురూ వారి పని వారు చేసుకొని పోసాగారు.
.
అగ్నిదేవుడు వాయుదేవుడు ఒకరికొకరు సహాయపడుతూ లంకనంతా అగ్నిగుండంగా మార్చి వేశారు.
.
ఫెళఫేళార్భాటాలతో ఇళ్ళన్ని కాలి బ్రద్దలై కూలిపోసాగాయి.
.
అటుఇటు పరుగెడుతూ తమ వారిని ఎలా రక్షించుకోవాలో తమనెట్లా కాపాడుకోవాలో దిక్కుతోచక పరుగులుపెట్టే జనం.
.
జనంజనం
మహాదుఃఖసాగరం!!
.
హా తాత,
హా మిత్ర,
హా పుత్ర
అంటూ కేకలు వేస్తూ వీధులలో పరుగెడతున్న జనం ..
.
చంటిపాపడిని చంకన పెట్టుకొని ఒకతి
జుట్టు విరబోసుకొని జారినబట్టలు సవరించుకొనే సమయములేక మరొకతి.
మెట్లమీదనుండి వచ్చే సమయములేక మేడమీద నుండి దూకి ప్రాణాలు కాపాడుకొనేది ఇంకొకతి.
.
ముసలి,ముతక,పిల్లజెల్లా అంతా విపరీతమయిన భయముతో ప్రాణాలుకాపాడుకోవాలనే తపనతో వీధులవెంట పరుగులు పెడుతున్నారు.
.
కాలిన భవనాలనుండి
రాలిన మణి మాణిక్యాలు
.
ఎంత కాల్చినా అగ్నిదేవుడికి తృప్తి కలగటంలేదు .
ఎంతమంది రాక్షసులను చంపినా మారుతికి తృప్తికలగటంలేదు...
ఇరువురికీ తృప్తిలేదు.
.
వలయాలు వలయాలుగా తిరుగుతున్న అగ్ని శిఖలు లంకలో విలయాలను సృష్టిస్తూ ప్రళయవేళను మైమరపిస్తున్నవి.
.
ఎవడీ కోతి
ఎందుకు చేశాడు ఈ రీతి?
ఏమివీడి నిర్భీతి?
.
వీడు ఇంద్రుడా?
వీడు రుద్రుడా??
వీడు కుబేరుడా ?
కాదుకాదుమనపాలిటి
కాల యముడు
అని చర్చించుకుంటూ పరుగులుపెడుతున్నారు లంకా నగరవాసులు.
.
వూటుకూరు జానకిరామారావు
కామెంట్‌లు లేవు:
కామెంట్‌ను పోస్ట్ చేయండి