శ్రీ ధూర్జటిమహాకవి ఇలా అంటున్నారు

🙏 శ్రీరామ జయరామ జయజయరామ 🙏 సర్వే జనాః సుఖినో భవన్తు 🙏

శ్రీ ధూర్జటిమహాకవి ఇలా అంటున్నారు

శా//అంతామిథ్య తలంచి జూచిన నరుం డట్లౌటెరింగిన్ సదా/ 

కాంతల్పుత్రులు నర్థమున్ తనువు నిక్కంబంచు మోహార్ణవ/

భ్రాంతిం జెంది జరించు గాని,పరమార్థంబైన

నీయందు దా/

జింతాకంతయు జింత నిల్పడు గదా! శ్రీకాళహస్తీశ్వరా!//

(జాగ్రత్తగా ఆలోచిస్తే ఈ జగత్తులో 

కనిపించేవి,వినిపించేవి, అయిన సమస్త విషయములు అశాశ్వతములే.

ఈ విషయం తెలిసినప్పటికీ, మానవులు, భ్రాంతి వల్ల నా భార్య, ,నాభర్త,నాపుత్రులు,నాధనము,నా శరీరము,అని అశాశ్వతములైన వీటినుండి సుఖాన్ని ఆశిస్తూ అగాధమైన ఈ సంసార సముద్రములో తిరుగుచున్నారు.

శాశ్వతము,పరమసత్యము, అయిన నీగురించి "చింతచెట్టు ఆకు" అంత కూడా ఆలోచించటం లేదు)

భగవంతుని మీదికి దృష్టి పోకుండా సంసారంలో మనల్ని కట్టిపడేసే, ప్రాపంచిక బంధాలు చాలా బలవత్తరమైనవి.

వాటినుండి మనంతట మనం ముక్తి పొందలేము. ఈశ్వరానుగ్రహంతోనే అది సాధ్యం అంటున్నారు.

శా / ఆలంచున్ మెడ గట్టి, దానికి నపత్యశ్రేణి గల్పించి తత్/

బాల వ్రాతము నిచ్చి పుచ్చుటను సంబంధంబు గావించి యా/

మాలర్కంబున బాంధవం బనెడి ప్రేమం గొందఱం ద్రిప్పగా/

సీలన్ సీల యమర్చి నట్లొసగితో ! శ్రీకాళహస్తీశ్వరా! //

(స్వామీ! భార్యాభర్తలనే సంబంధం మెడకు కట్టావు. సంతానాన్ని కనటం అనే ప్రక్రియ ఏర్పాటు చేసావు. ఆడపిల్లలను ఇవ్వడం, కోడండ్రను,తెచ్చుకోవడం, అనే తతంగంతో క్రొత్త క్రొత్త బాంధవ్యాలను, ప్రేమలను కల్పిస్తున్నావు.

 ఈ విధంగా మానవులను సంసారంనుండి బయటపడకుండా త్రిప్పటం అనేది, మరలలో మేకులను గట్టిగా బిగించినట్లు ఉన్నది.

సీలలో సీలలాగా బిగింపబడిన ఈ బంధములనుండి మా అంతట మేము ఎలా బయటపడగలం?

శ్రీకాళహస్తీశ్వరా! నీవే దయతో ఈ బంధములనుండి విముక్తులను చేసి మాకు ముక్తిని ప్రసాదించు స్వామీ )

శుభమస్తు,

తూములూరి మధుసూదనరావు,

18-2-'26.