శ్రీ శివ మంగళాష్టకమ్

 *శివ మంగళాష్టకమ్* 

భవాయ చంద్ర చూడాయ నిర్గుణాయ గుణాత్మనే | 

కాలకాలాయ రుద్రాయ నీలగ్రీవాయ మంగళమ్ || 

వృషారూఢాయ భీమాయ వ్యాఘ్ర చర్మాంబరాయ చ | 

పశూనాంపతయే తుభ్యం గౌరీకాంతాయ మంగళమ్ ||

భస్మోద్ధూళిత దేహాయ వ్యాళ యజ్ఞోపవీతినే | 

రుద్రాక్షమాలా భూషాయ వ్యోమకేశాయ మంగళమ్ || 

సూర్యచంద్రాగ్నినేత్రాయ నమః కైలాసవాసినే | 

సచ్చిదానందరూపాయ ప్రమథేశాయ మంగళమ్ ||

మృత్యుంజయాయ సాంబాయ సృష్టిస్థిత్యంత కారిణే | 

త్ర్యంబకాయ చ శాంతాయ త్రిలోకేశాయ మంగళమ్ ||

గంగాధరాయ సోమాయ నమో హరిహరాత్మనే | 

ఉగ్రాయ త్రిపురఘ్నాయ వామదేవాయ మంగళమ్ ||

సద్యోజాతాయ శర్వాయ భవ్యజ్ఞాన ప్రదాయినే | 

ఈశానాయ నమస్తుభ్యం పంచవక్త్రాయ మంగళమ్ ||

సదాశివ స్వరూపాయ నమస్తత్పురుషాయ చ | 

అఘోరాయ చ ఘోరాయ మహాదేవాయ మంగళమ్ ||

శ్రీ చాముండాప్రేరితేన రచితం మంగళాస్పదం తస్యాభీష్ఠ ప్రదం 

శంభో యఃపఠేన్మంగళాష్టకమ్ | 

సర్వార్థసిద్ధి మాప్నోతి స సాయుజ్యం తతఃపరమ్ ||

*ఇతి శ్రీ శివ మంగళాష్టకమ్ సంపూర్ణమ్*

🙏