రామాయణమ్.115
.
సీతమ్మను చూస్తుంటే ఆవిడకు సంతోషం ఒక మురిపెం ! చిన్నపిల్లల ముద్దుమాటలకు కలిగే సంతోషం సీతమ్మమాటలవలన ఆవిడకు కలిగి ఆ మహాసాధ్విని ఆనందసాగరంలో ముంచెత్తుతున్నాయి .
.
ఆవిడ మాటలకు మెచ్చి ఏదైనా ఇవ్వాలనుకొని సీతా ! నీకు ఏమి వరము కావాలో కోరుకో అమ్మా ! నీకు కావలసినది ఇస్తాను .అని పలికింది అనసూయామాత.
.
తల్లీ! నీ ఆప్యాయతే నాకు కొండంత వరము నాకు అది చాలమ్మా అని బదులిచ్చింది సీతమ్మ.
.
పెద్దలకు అనుగ్రహము కలిగితే ఆగరుకదా !
.
విదేహపుత్రీ ! ఇదిగో నీకు దివ్యములు,శ్రేష్ఠములు అయిన ఈ పూలమాలలు,వస్త్రము,అలంకారములు,అంగరాగము,శ్రేష్టమైన మైపూతను ఇస్తున్నాను .ఇవి ఎల్లప్పుడు ఉంటాయి.ఈ వస్త్రము మాయదు,నలగదు. ఈ దివ్యమైన అంగరాగము పూసుకొని నీవు నీ భర్తను శోభింపచేయగలవు.
.
అనురాగం తో అనసూయామాత ఇచ్చిన వస్తువులు స్వీకరించింది సీతమ్మ.
.
స్థిరనియమాలు గల అనసూయా మాత తనకు ప్రియం కలిగించే ఒక విషయం సీతమ్మను అడిగింది.
.
అమ్మాయీ ఇప్పుడు చెప్పవే ! నీ పెళ్ళి ముచ్చట్లు!
సీతమ్మను దగ్గరగా కూర్చోపెట్టుకుని ముద్దుగా చూస్తూ అడిగింది ముదుసలి ముత్తయిదువ మహాసాధ్వి అనసూయా మాత.
.
ఆవిడకు సీతమ్మ చెప్పే కబుర్లు మహదానందాన్ని కలిగిస్తున్నాయి.
.
సీతమ్మ సవివరంగా తను తన తండ్రికి ఏవిధంగా దొరికింది,తన స్వయం వరాన్ని తండ్రి ఎలా ప్రకటించినదీ,మహర్షివిశ్వామిత్రులవారితో రామలక్ష్మణులు వచ్చిన సంగతి ,రాముడు ఏవిధంగా వింటిని ఎక్కుపెట్టి విరిచాడో ఆ సంగతి వివరంగా తెలిపింది.
.
రాముడు శివధనుర్భంగం గావించిన వెంటనే నన్ను రామునకు ఇచ్చుటకై నా తండ్రి చేతిలోనికి జలకలశము తీసుకొన్నాడు.
.
కానీ!
.
రాముడు అందుకు అంగీకరించలేదు!
.
తన తండ్రీ,ప్రభువూ అయిన దశరధమహారాజు అభిప్రాయము తెలుసుకొనకుండా స్వీకరించను అని వినయంగా మా నాన్నగారికి తెలియచేశాడు.
.
అప్పుడు నా తండ్రి జనకమహారాజు దశరథ మహారాజుకు కబురుపెట్టగా ఆయన వచ్చి తన సమ్మతిని తెలియచేసిన తరువాత మాత్రమే నన్ను స్వీకరించాడు రాముడు..
.
మా చెల్లెళ్ళకు కూడా అదే సమయములో లక్ష్మణ,భరత,శత్రుఘ్నులతో వివాహం జరిపించారు మా తండ్రిగారు.
అని తమ వివాహ వృత్తాంతాన్ని అనసూయామాతకు తెలిపింది సీతమ్మ.
.
NB.
.
మన సినిమాలలో చూపించినట్లుగా విల్లువిరిచిన వెంటనే వరమాల రాముడి మెడలో వేయలేదు సీతమ్మ.
.
తండ్రి అభిప్రాయము ముఖ్యము రామచంద్రుడికి!
.
తండ్రికి దశరథరాముడు ఇచ్చిన గౌరవము అది!
.
జానకిరామారావు వూటుకూరు
కామెంట్‌లు లేవు:
కామెంట్‌ను పోస్ట్ చేయండి