అన్నం పరబ్రహ్మ స్వరూపం*

 *అన్నం పరబ్రహ్మ స్వరూపం*

 అన్నదానం అన్ని దానాలలోకెల్ల ఉత్తమమైనది..

ఎప్పుడైన ఎవరైనt ఎక్కడైన సరే అన్నం పెట్టమని అడిగినారంటే అది మీ అదృష్టమనే చెప్పవచ్చు, అంటే మీరు పుణ్య కాలంలోనికి ప్రవేశిస్తున్నారని అర్ధం, భగవంతుడు ఎవర్నో అడ్డం పెట్టుకొని వారి ద్వారా మీకు పుణ్య ఫలమును ప్రాప్తి చేస్తున్నాడు అని అర్ధం. దీన్నీ సరిగ్గా మనం వినియోగించుకోవాలి. నోరు లేని జంతువులకు, గోమాత కడుపు నింపిన కూడా కోట్ల రెట్లు ఫలమధికం. 

మనమే వెళ్ళి అన్నం పెట్టడం కన్నా, వాళ్ళు నీ ముందుకు వచ్చి అన్నం పెట్టు అమ్మా అని చెయ్యి జాచితే అంత కంటే పుణ్యం ఇంకొకటి లేదు. ఒక గోమాత నీ ఇంటి ముందుకు నీవు పిలవకుండానే వచ్చిదంటే వెంటనే దానికి గ్రాసం గాని, అన్నం కాని పెట్టవలయును. పిలవక పోయినా కాకతాళీయంగా ఒక సన్యాసి, ఒక శ్రీవిద్యోపాసకుడు, ఒక భగవంతుడు, ఒక వేదమూర్తి, మాలధారణ స్వామీ నీఇంటికి వస్తే కొన్ని కోట్ల జన్మల పాపం తరిగిపోతుంది, నీవు గాని అతనికి ఆతిధ్యం ఇచ్చినా కనీసంలో కనీసం కాస్త మంచి తీర్ధం అంటే మంచినీరు అందించ్చినా ఎంతో పుణ్యదాయకం.

ఏమో ఏ శంకరాచార్యులు మారు రూపంలో వస్తారో..!! యోగులు, జ్ఞానులు, బాబాలు అన్నం తిని, ఎదుటి వారి పాపాలను తీసుకొని వెళతారు. డబ్బులు తీసుకొని కాదు. తన భక్తుల ఆకలి తీర్చినందులకు భగవంతుడు మిక్కిలి సంతోషించి వెంటనే తగు పుణ్యమును మన జమలో వేసేస్తాడు. మన పాప కర్మ తొలిగిపోతుంది. భగవంతుడు నీ కర్మ తొలిగించడానికి నీ పాప కర్మ తొలిగించడానికి వారు నీ ఇంటికి వెతుక్కొంటూ వస్తారు. 

నీవు పెట్టే పట్టెడు అన్నంతో నీ జన్మ జన్మల పాపాన్ని అంత వాళ్ళు తొలగిస్తారు. నీవు పెట్టే పట్టెడు మెతుకుల కోసం వారు రారు, మరలా నీవు రమ్మని బ్రతిమలాడినా రారు. అది ఆ సమయములోనే అంతే. ఒకసారి కాదనుకోన్నావా మరలా తిరిగి రాదు. ఇంటి ముందుకు వచ్చిన గోమాత కూడా అంతే, నీ పాపాలు అన్నీ తీసుకొని వెళుతుంది, నీవు పెట్టిన ఒక్క అరటి పండుతో..!!

అమ్మా అన్నం పెట్టు తల్లీ అని అడిగినవానికి లేదనకుండా వున్నది పెట్టు, నీ తరతరాలను ఆశీర్వదించి వెళతాడు. ఎవ్వరూ కూడా నీ ఇంటికి తిండి దొరకక రారు, కావున “అమ్మా అన్నం పెట్టు” అని అడిగిన వారికి, మీకు ఎన్ని పనులున్నా కూడా మానుకొని పెట్టండి. ఇంటికి వచ్చిన గోమాతను ఖాళీ కడుపుతో మాత్రం పంపకండి, వాటికి పెట్టిన వెంటనే మీకు శుభ ఫలితం కనిపిస్తుంది. నల్లని ఆవుకు, నల్లని కుక్కకు అన్నం పెట్టడం వలన అపమృత్యు దోషం తొలిగిపోతుంది. అన్నంలో బెల్లం కలిపి పెడితే ఇంకా మంచిది. "అతిథి దేవోభవ" అనే మాటకు అసలు అర్దం ఇదే.

అన్నదానం మహాదానం అంటే కూడా ఇదే..